«Ի՞նչ կկորցնի Հայաստանը հարվածելով Ռուսաստանին. Տագնապի ազդանշանն արդեն հնչել է»
ՎԵՐԼՈՒԾՈՒԹՅՈՒՆՆԵՐ
Tsargrad.tv–ն գրում է, որ Հայաստանի խորհրդարանի խոսնակ Ալեն Սիմոնյանը հայտարարել է, որ վավերացվել է Հռոմի ստատուտը, որը Միջազգային քրեական դատարան (ՄՔԴ) ստեղծելու մասին պայմանագիր է։ Հիշեցնենք, որ ավելի վաղ ՄՔԴ-ն ՌԴ նախագահ Վլադիմիր Պուտինին ձերբակալելու օրդեր էր տվել։ Այսպիսով, Հայաստանն այժմ պարտավոր է ձերբակալել Ռուսաստանի ղեկավարին, եթե նա այդ երկիր ժամանի պաշտոնական այցով։ Հայաստանի և Ռուսաստանի համար դրա հետևանքները tsargrad.tv–ի համար գնահատել է քաղաքագետ, Մերձավոր Արևելքի և Կովկասի հիմնախնդիրների փորձագետ Ստանիսլավ Տարասովը։
Քաղաքագետ Ստանիսլավ Տարասովը նշել է, որ Հայաստանի իշխանություններն արդեն փորձել են արդարանալ ասելով, որ Հռոմի ստատուտի վավերացումը կապված է Ադրբեջանի հետ առճակատման հետ։ Բայց Ռուսաստանում հիանալի հասկանում են, որ դա, ինչ էլ ասեն, հակառուսական գործողություն է։ «Ներկայումս, ինչպես գիտենք, առևտուրը դադարեցնելու կամ որևէ պատժամիջոցներ կիրառելու բացասական գործողությունների սցենար չկա։ Ներկայիս տագնապալի իրադարձությունը, իմ կարծիքով, այն է, որ Հայաստանը հետ է կանչել իր ներկայացուցչին ՀԱՊԿ-ից»,– ասել է Ստանիսլավ Տարասովը։
Նա նաև հիշեցրել է Ֆրանսիայի արտգործնախարարի այցը Հայաստանի մայրաքաղաք, որի ժամանակ խոսել են ռազմական փաստաթղթեր ստորագրելու պատրաստակամության մասին, այն է Փարիզի և Երևանի միջև ռազմական դաշինք կնքելու մասին։ «Նման պայմաններում Հայաստանի ներկայությունը ՀԱՊԿ-ում անոմալիա է թվում, այո։ Եվ մենք չենք բացառում, որ Հայաստանը, ընդհանուր առմամբ, հաշվի առնելով, որ արդեն հետ է կանչել ՀԱՊԿ-ում իր ներկայացուցչին, կարող է հայտարարել այդ կազմակերպությունից իր դուրս գալու մասին»,- նշել է Ստանիսլավ Տարասովը։
Փորձագետը նաև ուշադրություն է հրավիրել Մոսկվա-Երևան-Բաքու եռանկյունու բարդությունների վրա։ Հիշեցնենք, որ Ադրբեջանի նախագահ Իլհամ Ալիևը հրաժարվել էր Գրանադայում ՀՀ վարչապետ Նիկոլ Փաշինյանի հետ հանդիպումից։ Իսկ այնտեղ, ըստ հայկական աղբյուրների, նախապատրաստական աշխատանքներ էին տարվում հարաբերությունների կարգավորումը նախատեսող, այսպես կոչված, հայեցակարգային փաստաթղթի ստորագրման համար։ «Այսինքն՝ Փաշինյանը հայտնվել է մի իրավիճակում, երբ կորցրել է Ղարաբաղը և մնացել առանց խաղաղության պայմանագրի։ Եվ դա կբարդացնի իրավիճակը հենց Հայաստանի ներսում, անկասկած», - ընդգծել է Ստանիսլավ Տարասովը:
Եվ դա նաև այն պատճառով, որ 2018 թվականի մայիսին Փաշինյանի իշխանության գալուց ի վեր Հայաստանը մշտական ճգնաժամի մեջ է։ Ընդ որում ներկայումս կան նշաններ, որ Հայաստանը կարող է կորցնել իր պետականությունը, եզրափակել է քաղաքագետը։
Նյութը հրապարակման պատրաստեց Կամո Խաչիկյանը
