«Զանգեզուրի միջանցքի հեռանկարները. Հայաստանը մտահոգված է Սյունիքի մարզի ճակատագրով»
ՎԵՐԼՈՒԾՈՒԹՅՈՒՆՆԵՐ
Ntv.ru-ն գրում է, որ վերջին օրերն են, երբ ինչ-որ մեկը Ղարաբաղի մայրաքաղաքն անվանում է Ստեփանակերտ։ Նրա պաշտոնական ադրբեջանական անվանումը Խանքենդի է, և այժմ այն հանդիսանում է Ադրբեջանի շրջաններից մեկի կենտրոնը։ Չճանաչված Լեռնային Ղարաբաղի Հանրապետության իշխանությունները հայտարարել են դրա վերացման մասին։
Պաշտոնական Երևանի համար Ղարաբաղն արդեն դարձել է շրջված էջ, իսկ իրենք՝ Հայաստանի իշխանությունները, երևում է, պատրաստվում են ապրել նոր իրականության մեջ։ Երևանում շատերն այժմ կարծում են, որ հաջորդը կլինի Հայաստանի Սյունիքի մարզը, որը գտնվում է Ադրբեջանի էքսկլավ Նախիջևանի ինքնավարության և մնացած Ադրբեջանի միջև: Բաքվի համար հաղթական 2020 թվականի ղարաբաղյան պատերազմից հետո Ադրբեջանը հայտարարեց, որ ցանկանում է ստեղծել այսպես կոչված Զանգեզուրի տրանսպորտային միջանցքը Հայաստանի տարածքով։ Դրանով շահագրգռված է նաև Բաքվի մերձավոր դաշնակից Թուրքիան, որն այստեղ ունի իր տնտեսական շահերը։ Պատահական չէ, որ վերջերս Ռեջեփ Թայիփ Էրդողանը Իլհամ Ալիևին հանդիպել է հենց Նախիջևանում։
Բերտրան Շոլլեր, ռազմավարության և աշխարհաքաղաքականության խորհրդատու.- «Ադրբեջանը կարողացավ պաշտպանել իր շահերը Լեռնային Ղարաբաղում և ցանկանում է թելադրել միջանցքի ստեղծման պայմանները։ Բայց եթե ուշադիր նայեք Իսրայելի, Թուրքիայի և Ադրբեջանի դիրքորոշմանը, ապա պարզ է դառնում, որ իրականում նրանց ցանկությունը ոչ թե տարածաշրջանային կապերի վերականգնում է, այլ Իրանի հետ սահմանից մինչև այդ միջանցքը հայկական տարածքի փաստացի գրավելը»։
Թուրքիայում, փաստացի, արդեն բարձրաձայն են ասում, որ ամեն գնով պետք է միջանցք ստեղծել Հայաստանի Սյունիքի մարզի հարավային հատվածով, որը հայտնի է նաև Զանգեզուր անունով։
Սինան Օգան, քաղաքական գործիչ, Թուրքիայի նախագահի նախկին թեկնածու.- «Զանգեզուրի շրջանն արհեստականորեն խլեցին Ադրբեջանից և տրվեցին Հայաստանին։ Զանգեզուրի միջանցքը բացվելու է: Ո՛չ Իրանը, ո՛չ Հայաստանը, ո՛չ մյուս երկրները չեն կարող դա կանխել»։
Նշենք նաև, որ հենց Զանգեզուրի միջանցքի հարցն է դարձել Հայաստանի իշխանության դեմ ընդդիմության բողոքի ցույցերի հիմնական թեմաներից մեկը:
Նյութը հրապարակման պատրաստեց Կամո Խաչիկյանը
