Ռուսաստանը կարող է պատժամիջոցներ ներդնել «Քաղպայմանագրի» դեմ

Հայաստանը հայտնվել է Ռուսաստանի կոշտ քննադատության թիրախում։ Երեկ խորհրդարանն իշխող «Քաղաքացիական պայմանագիր» կուսակցության 60 կողմ ձայներով վավերացրել է ՄՔԴ Հռոմի կանոնադրությունը, որի դեմ Ռուսաստանը տևական ժամանակ բողոքներ էր ներկայացնում։ Ընդդիմադիր երկու խմբակցությունները՝ «Պատիվ ունեմ» և «Հայաստան» դաշինքը, նախ հրաժարվեցին մասնակցել հարցի քննարկմանը խորհրդարանում, ապա և երկու խմբակցությունների 22 պատգամավորներ դեմ քվեարկեցին։

Հռոմի ստատուտը վավերացվեց 60 կողմ ձայներով։ Դրանից անմիջապես հետո ընդդիմությունը հայտարարեց, որ ստատուտի վավերացումը ոչ միայն հակասահմանադրական է, այլ նաև լրջագույն խնդիրներ է հարուցելու Ռուսաստանի հետ։ ՄՔԴ-ն նշենք՝ ձերբակալման օրդեր է տվել Ռուսաստանի նախագահ Վլադիմիր Պուտինի համար։ Հայկական կողմն էլ փորձում է համոզել, թե ստատուտի վավերացումն ուղղված է բացառապես Ադրբեջանի դեմ և հակառուսական որևէ քայլ պետք չէ այդտեղ տեսնել, մինչդեռ նման հավաստիացումները Ռուսաստանին առանձնապես չեն էլ հուզում։

Երեկ մի ամբողջ շարք ռուսաստանյան քաղաքական գործիչներ կոշտ քննադատություն են հնչեցրել Հայաստանի հասցեին, այդ թվում Կրեմլի պաշտոնական խոսնակ Դմիտրի Պեսկովը Հայաստանի իշխանությունների այս քայլը թշնամական է որակել։ Երեկ արդեն տեղեկություններ էին շրջանառվում, որ Ռուսաստանը կարող է պատժամիջոցներ սահմանել Հռոմի ստատուտի վավերացմանը կողմ քվեարկած իշխանական 60 պատգամավորների նկատմամբ, ի դեպ 71 հոգանոց խմբակցությունից քվեարկությանը այս կամ այն պատճառներով չեն մասնակցել 11 հոգի, որոնցից առնվազն 2-ի պարագան խիստ զարմանալի էր։ Օրինակ, քվեարկությանը չեն մասնակցել գործարարներ Գուրգեն Արսենյանն ու Խաչատուր Սուքիասյանը, որոնք որոշ բիզնես կապեր ունեն Ռուսաստանի հետ և այս կերպ թերևս փորձել են ապահովագրել իրենց։ Քվեարկությանը չեն մասնակցել նաև ծագումով Ջավախքից Շիրակ Թորոսյանը, սակայն այդ հանգամանքը չէր վրիպել գործող իշխանությունների աչքից և նրանց պարտադրել էին հայտարարությունների ժամին ինքնամոռաց գովել Հռոմի ստատուտի վավերացման փաստը։

Փաստացի, փաշինյանական իշխանությունը ցանկանում է ոչ միայն փոխել Հայաստանի քաղաքական վեկտորն ու խնդիրներ հարուցել Ռուսաստանի հետ հարաբերություններում, այլ նրա մեջ ներգրավվել բոլոր պատգամավորներին։ ՔՊ մեր աղբյուրի փոխանցմամբ՝ Փաշինյանը խիստ զայրացել է, որ 11 պատգամավորներ չեն մասնակցել քվեարկությանը և որոշել է ինքն էլ անհատական պատժամիջոցներ սահմանել նրանց դեմ։

Նունե Մանուկյան