Երևանի քաղաքապետի ընտրությունները կարող են փորձաքար դառնալ, թե՛ ընդդիմության, թե՛ իշխանության համար

Երևանի ավագանու կազմ անցած ընդդիմադիր երեք կուսակցություններն ամենայն հավանականության կմիավորվեն։ Գոնե մեկ հարցում՝ Երևանի քաղաքապետի պաշտոնը գործող իշխանություններին չթողնելու նպատակով։ «Մայր Հայաստան» դաշինքը վերահաստատել է՝ «Քաղաքացիական պայմանագրին» Երևանում իշխանազրկման համար պատրաստ են աջակցել քաղաքապետի այն թեկնածուին, որը կհայտարարի, որ կիսում է Հայաստանում ամբողջական իշխանափոխություն իրականացնելու իրենց դիրքորոշումը։

Քաղաքապետի թեկնածու Հայկ Մարությանը, որին այդ պաշտոնի համար առաջադրել է «Ազգային առաջընթաց» կուսակցությունը հրապարակավ ընդունել է «Մայր Հայաստանի» դիրքորոշումն ամբողջական իշխանափոխության անհրաժեշտության մասին։ Մարությանը տեսաուղերձով հաստատել է, որ իրենց քաղաքական ուժը կիսում է Հայաստանում իշխանափոխություն իրականացնելու անհրաժեշտությունը, երրորդը, որ կարող է միանալ Հայկ Մարությանի քաղաքպետի պաշտոնում ընտրելու հնարավորությանը՝ «Հանրային ձայն» կուսակցությունն է, որի առաջնորդ Վարդան Ղուկասյանն առաջարկել է ընդդիմադիր թեկնածուներին օնլայն հանդիպել ժողովրդի աչքի առաջ և հայտարարել, որ բարեկիրթ պահվածքից ձեռնպահ կմնա։ «Մի հատ քֆուր իմ բերնից դուրս չի գա, այդ քննարկման ժամանակ իմ պես լիրիկական անձնվորության երբեք տեսած չեք լինի»,- ասել է Ղուկասյանը։

Հիշեցնենք՝ այս երեք քաղաքական ուժերը միասին 33 մանդատ ունեն Երևանի ավագանու կազմում։ Իշխող «Քաղաքացիական պայմանագիրը» և նրա կցորդ «Հանրապետություն» կուսակցությունը ընդամենը 32 մանդատ ունեն և ընտրությունների առաջին փուլում, Երևանի քաղաքապետ կարող է դառնալ այն թեկնածուն, որը կստանա ավագանու 33 ձայն անդամների քվեն, թեև 3 քաղաքական ուժերի միավորումը սարերի ետևում չէ, սակայն լուրջ վտանգներ կան այս առումով։ Իշխանությունները փորձում են աշխատել տարբեր ուժերում ընդգրկված մարդկանց վրա առանձին-առանձին, կամ էլ որոշներին փակելով զրկել նրանց ավագանու առաջին նիստին քաղաքապետի ընտրություններին մասնակցելու հնարավորությունից։ Այդ դեպքում 2 շաբաթ անց նոր ընտրություններ են կայանալու, որտեղ քաղաքապետ կդառնա ամենաշատ ձայները ստացած թեկնածուն։

Անահիտ Սարգսյան