Ադրբեջանի ինչի՞ն էր պետք Ռուբեն Վարդանյանի կալանավորումը
ՎԵՐԼՈՒԾՈՒԹՅՈՒՆՆԵՐ
bfm.ru-ն գրում է, որ Ադրբեջանի սահմանային ծառայությունը Ռուբեն Վարդանյանի կալանավորումը բացատրել է նրանով, որ նա «ապօրինի է գտնվել երկրում»։ Եվ դա չնայած այն հանգամանքին, որ, ըստ նախնական տվյալների, այնտեղ ապրող 120 հազար ղարաբաղցի հայերի գրեթե կեսն արդեն լքել է չճանաչված հանրապետությունը, բայց այնտեղ «ապօրինի գտնվելու համար» զանգվածային ձերբակալություններ չեն եղել։ Վարդանյանը կոնկրետ է բերման ենթարկվել: Տեղեկություններ են ստացվել նաև Լեռնային Ղարաբաղի Անվտանգության խորհրդի նախկին քարտուղար Վիտալի Բալասանյանի ձերբակալության մասին, բայց առանց պաշտոնական հաստատման։
Ըստ Business FM-ի հետ զրուցած փորձագետների Բաքվի անհատական մոտեցումը Ռուբեն Վարդանյանի նկատմամբ բացատրվում է առաջին հերթին նրանով, որ նա ունենալով ռեսուրսներ միջազգային մակարդակով ակտիվ մեդիա արշավ է ծավալել Ադրբեջանի ղեկավարության դեմ։ Բայց դա միակ պատճառը չէ, ասել է քաղաքագետ Գեորգի Բովտը: «Այս դեպքում նա հանդես է եկել որպես Ղարաբաղի հայրենասեր։ Որպես կրքոտ քաղաքական գործիչ նա ավելի վտանգավոր է Ադրբեջանի համար, քան Փաշինյանը, ում հետ հիմա պարզ է, թե ինչպես վարվել,- ասել է նա,- իսկ ընդհանրապես, Ալիևին հիմա Վարդանյանը Հայաստանում պետք չէ, քանի որ Վարդանյանը կարող է դառնալ Փաշինյանի բավականին ուժեղ այլընտրանք, և այնպիսի այլընտրանք, որն այնքան էլ ձեռնտու չէ Ադրբեջանին։ Նրանց համար ավելի հեշտ է հարցերը Փաշինյանով ավարտել, հետո թող հայերն իրենք զբաղվեն»:
Խոսելով Վարդանյանի հնարավոր ճակատագրի մասին ադրբեջանցի, հայ և ռուս քաղաքագետները տարբեր կանխատեսումներ են անում՝ երկարաժամկետ ազատազրկումից մինչև նրան Երևան կամ նույնիսկ Մոսկվա ուղարկելը։ Թեև հիշեցնենք, որ Ռուբեն Վարդանյանը հրաժարվել է ՌԴ քաղաքացիությունից։
Նյութը հրապարակման պատրաստեց Կամո Խաչիկյանը
