Նրանք սակարկելու են հայ միլիարդատիրոջ, բայց ոչ Լեռնային Ղարաբաղի ժողովրդի համար
ՎԵՐԼՈՒԾՈՒԹՅՈՒՆՆԵՐ
Politnavigator.net-ը գրում է, որ Լեռնային Ղարաբաղի (Արցախ) նախկին պետնախարար և «Տրոյկա Դիալոգ»-ի հիմնադիր Ռուբեն Վարդանյանը ձերբակալվել է ադրբեջանցի սահմանապահների կողմից Հայաստան մեկնելու փորձի ժամանակ։ Նրան տարել են Բաքու «համապատասխան որոշում կայացնելու համար»։ Ադրբեջանում Վարդանյանին սպառնում է մինչև 10 տարվա ազատազրկում անջատողականության և երկիր ապօրինի մուտքի հոդվածներով։
Երբ Ադրբեջանն իր վերահսկողության տակ վերցրեց չճանաչված հանրապետությունը, Վարդանյանն ասաց, որ «դա ընկնում է Ալիևի և նրա ընտանիքի արյունոտ ձեռքերի վրա», և կոչ արեց ՄԱԿ-ին պատժամիջոցներ կիրառել նրա նկատմամբ, իսկ Հայաստանին ճանաչել Արցախի անկախությունը։ Չեղավ ոչ մեկը, ոչ մյուսը։
«Վարդանյանը, ցավոք, հրաժարվել է Ռուսաստանի քաղաքացիությունից։ Մեր ԱԳՆ-ի համար խնդրահարույց կլինի նրան դուրս բերելը»,- նշել է ՌԴ Պետդումայի պատգամավոր և հեռուստահաղորդավար Եվգենի Պոպովը։
Միաժամանակ ՌԴ նախագահի մամուլի քարտուղար Դմիտրի Պեսկովն ասել է, որ չգիտի, թե Վարդանյանը դեռ քաղաքացիություն ունի՞, և խոստացել է պաշտպանել նրան։
Քաղաքագետ Մաքսիմ Ժարովը կարծում է, որ Վարդանյանն իր քաղաքացիությունից հրաժարվելու և Ստեփանակերտ մեկնելու մասին ժամանակին պայմանավորվել է Կրեմլի հետ, որը ցանկանում էր իր միջոցով ազդել Հայաստանի քաղաքականության վրա։
Նրա գործընկեր Սերգեյ Մարկովը, ով սովորաբար Անդրկովկասի իրադարձությունները մեկնաբանում է հօգուտ Բաքվի, համաձայն չէ Ժարովի հետ։ Նա կարծում է, որ գործարարն այժմ կապ չունի Մոսկվայի հետ, ինչի պատճառով էլ ձերբակալությունը հնարավոր է դարձել։ «Եթե կապ լիներ, ապա կամ խաղաղապահները կտեղափոխեին, կամ ռուսական հատուկ ծառայությունները կօգնեին։ Բայց դա չի եղել: Նրանք չօգնեցին: Դա նշանակում է, որ Վարդյանյանը կարևոր չէ ՌԴ իշխանությունների համար։ Իսկ Վարդանյանին Փաշինյանն է հանձնել Ադրբեջանի իշխանություններին, քանի որ վախենում է, որ Հայաստանում Վարդանյանը կարող է կազմակերպել Փաշինյանի հեռացումն իշխանությունից։ Վարդանյանի տեղաշարժերի մասին Փաշինյանի մարդիկ ժամանակին տեղեկատվություն են տվել բոլոր նրանց, ովքեր դրա կարիքն ունեն: Ի վերջո, Վարդանյանը ցանկանում էր դառնալ Հայաստանի ղեկավար Ղարաբաղը որպես ցատկահարթակ օգտագործելով։ Շատերը հավատում են, որ դա այդպես է: Առայժմ Փաշինյանի դեմ որևէ ապացույց չկա, բայց հավանաբար շուտով կլինեն»,- վստահ է Մարկովը։
RT-ի գլխավոր խմբագիր Մարգարիտա Սիմոնյանը կարծում է, որ Վարդանյանը մեկ տարի առաջ մեկնելով Արցախ կատարել է անձնազոհության արարք։ «Սարսափելի է պատկերացնել, թե ինչ ճակատագիր է նրան սպասվում. Եվ նա՝ համաշխարհային մակարդակի միլիարդատերը, դա արել է կամավոր։ Նախ որդուն ուղարկեց Ղարաբաղ՝ թեժ պատերազմի մեջ։ Որդին մեծացել է Լոնդոնում: Հետո նա ինքը գնաց։ Նա հրաժարվեց ամեն ինչից, այդ թվում քաղաքացիությունից ու հեռացավ։ Ով այս օրերին, երբ արդեն ամեն ինչ պարզ էր, զանգահարել է Ռուբենին, աղաչել, որ վերադառնա, օգնություն առաջարկելով։ Նա ասել է. «Ես կլինեմ այնտեղ, որտեղ իմ ժողովուրդն է: Եվ նա մնաց»,- գրել է Սիմոնյանը։
Նրա հետ համաձայն չէ ռադիոհաղորդավար Սերգեյ Մարդանը։
«Հիմա կսկսեն նվնվալ, թե իրականում Վարդանյանը մերն է։ Իսկ այն, որ նա ՌԴ քաղաքացիությունից դուրս է եկել, ոչինչ չի նշանակում։ Ի վերջո, Ռուսաստանը չի լքում «իր մարդկանց»։ Եվ հիմա հրամայական է արտաքին գործերի նախարարությունից մինչև ՊՆ բոլոր ռեսուրսները միացնել և գերությունից փրկել մեր սիրելի մարդուն ու մեծ հայրենասերին՝ Ռուբեն Վարդանյանին։ Հնարավոր է, որ ադրբեջանցիներին նույնիսկ ստիպված լինեն ինչ որ բան խոստանալ դրա դիմաց, բայց դա նշանակություն չունի»,- գրել է Մարդանը։
Նա կարծում է, որ ամենավատ բանը, որ սպասում է Վարդանյանին, նրա կապիտալի մի մասի կորուստն է (որը, ըստ Forbes-ի 1 մլրդ դոլար), և հիշեցրել է, որ գործարարն ունի ԱՄՆ-ի գրին քարտ և Կիպրոսի կացության թույլտվություն։ Մարդանի խոսքով Վարդյանյանը կապեր է պահպանում Ալեքսեյ Կուդրինի և Գերման Գրեֆի հետ, իսկ Անատոլի Չուբայսի միջոցով վճարել է ԱՄՆ Դեմոկրատական կուսակցությանն Արցախի ճակատագրին անդրադառնալու համար։
«Ռուբեն Վարդանյանը Բաքվի քննչական մեկուսարանից կարող է դուրս գալ որպես նոր մակարդակի քաղաքական գործիչ։ Գործիչ, ով ի վիճակի է փոխարինել Նիկոլ Փաշինյանին հայոց պատմության հաջորդ փուլում՝ այս տասնամյակի կեսերին»,- նշել է քաղաքագետ Ստանիսլավ Բելկովսկին։
«Ալիևին Վարդանյանը հիմա Հայաստանում պետք չէ, քանի որ Վարդանյանը կարող է բավականին ուժեղ այլընտրանք դառնալ Փաշինյանին, ինչն այնքան էլ ձեռնտու չէ Ադրբեջանին, նրանց համար ավելի հեշտ է այդ հարցերը փակել Փաշինյանի հետ»,- գրել է քաղաքագետ Գեորգի Բովտը։
«Մեծահասակ, բավականին հարուստ, կապերով մարդը կազատվի, կօգտվի իր կապերից։ Եվ երբ նրանք գործարք կնքեն, նա կունենա ազատություն ուր գնալ, ինչ քշել, որտեղ և ինչով ապրել։ Եվ դա ի տարբերություն փախստականների, որոնք այժմ թողնում են իրենց ողջ ունեցվածքն ու ողջ կյանքը Ղարաբաղում»,- ցավով նշել է փորձագետ Անդրեյ Նիկուլինը։
Նյութը հրապարակման պատրաստեց Կամո Խաչիկյանը
