Նիկոլ Փաշինյանի արկածախնդրությունը ծանրագույն հետևանքներ է ունենալու
ՎԵՐԼՈՒԾՈՒԹՅՈՒՆՆԵՐ
Հայաստանն աշխարհի ամենաանկախ երկիրն է աշխարհում, նրանից այլևս ոչինչ կախված չէ, սակայն այդ հանգամանքը չի խանգարում որպեսզի Նիկոլ Փաշինյանն ընդհանրապես ոչ դիվանագիտական բառապաշարով հայտարարություններ անի Ռուսաստանի հասցեին՝ նրան մեղադրելով ամեն ինչի մեջ։ Ըստ էության, Ռուսաստանին կարելի է արդարացիորեն քննադատել և իրենց իսկ վարքի՝ Արցախում թույլ տված բազմաթիվ սխալների՝ ընդհուպ հանցավոր անփութության կամ հանցավոր գործունեության մեջ, բայց այն ինչ այսօր անում է Հայաստանի վարչապետի պաշտոնը զբաղեցնող Փաշինյանը, կարող է ընդհուպ մինչև պետականության կորստի հանգեցնել։
Շաբաթ օրը Փաշինյանի վտանգավոր նարատիվներով լեցուն ուղերձից հետո Ռուսաստանի բազմաթիվ պաշտոնյաներ արձագանքել և քննադատել են, երեկ էլ նաև մի հայտարարություն է տարածել Ռուսաստանի արտգործնախարարությունը, նշելով, թե՝ Փաշինյանի ուղերձը պարունակում է անընդունելի հարձակումներ Ռուսաստանի դեմ և չի կարող այլ բան չառաջացնել, քան մերժում։ Ըստ ռուսների՝ Փաշինյանը փորձում է ազատվել ներքին ու արտաքին քաղաքականության մեջ ձախողումների պատասխանատվությունից՝ մեղքը բարդելով Մոսկվայի վրա, և Փաշինյանի հայտարարությունները հաստատում են ռուսների նախկին եզրակացությունները, որ Արևմուտքից ոգեշնչված և պաշտոնական Երևանի կողմից հրահրված Ռուսաստանի ու դաշնակցային հարաբերությունների համար կործանարար հարաբերությունները ոչ թե էպիզոդիկ, այլ համակարգային են։
Ռուսաստանը շարունակում է պնդել, թե հավատարիմ է եղել իր դաշնակցային պարտավորություններին, հարգել է հայկական պետականությունը և երբեք Հայաստանին չի կանգնեցրել ընտրության առաջ իրենց հետ, թե իրենց դեմ։ Այս պնդմանը կարելի է բազմաթիվ հակափաստարկներ բերել, սակայն խնդիրն ամենևին էլ փաստարկների արդարացված, կամ չարդարացված լինելը չէ, այլ այն վտանգը, որ Փաշինյանը կրկին կախել է Հայաստանի գլխին։
Ի դեպ, նրա սիրելի Արևմուտքն էլ առանձնապես ջանքեր չի գործադրում Արցախում ստեղծված ահասարսուռ իրավիճակը կարգավորելու համար, ընդամենը 1-2 հայտարարություններ են հնչում ԱՄՆ և եվրոպական տարբեր մակարդակի պաշտոնյաների կողմից։ Երեկ էլ պետդեպի խոսնակ Մեթյու Միլլերը հայտարարել է, թե ԱՄՆ-ն աշխատում է միջազգային առաքելություն ձևավորելու ուղղությամբ, որը կվերահսկվի Ադրբեջանի պարտավորությունների կատարումը, ապահովելու Լեռնային Ղարաբաղի բնակիչների իրավունքները և անվտանգությունը։ «Զատկից հետո կարմիր հավկիթ», ասում է հին հայկական ասացվածքը, իսկ Փաշինյանն առանձնապես ջանքեր չի գործադրում արցախցիների խնդիրները լուծելու համար։
Նարեկ Կարապետյան
