Փաշինյանի հարվածն Արարատ Միրզոյանին. Մի դավաճանության մեխանիկա

Մինչ Հայաստանի արտգործնախարար Արարատ Միրզոյանը ՄԱԿ Անվտանգության խորհրդի նիստում մանրամասն և բավական կոշտ շեշտադրումներով ներկայացնում էր ադրբեջանական վայրագությունները, նշում, որ Արցախից ստացվող տեսարաններն իսկապես «ցնցող» են, որ ադրբեջանական զինուժի կողմից կան սպանված ու վիրավոր երեխաներ, անհետ կորած երեխաներ, որոնց մայրերը հուսահատ փնտրտուքների մեջ են, որ հազարավոր անօթևան և սովի մատնված մարդիկ կան, որ ադրբեջանցիները սոցիալական ցանցերում կոչ են անում գտնել անհետ կորածներին բռնաբարելու և մասնատելու նպատակով, վարչապետ Փաշինյանը դրանից մի քանի ժամ առաջ Երևանում այլ պատկեր էր նկարագրում՝ պնդելով՝ «արցախցիների կյանքին ուղիղ սպառնալիք չկա»։

Հայաստանի վարչապետի պաշտոնը զբաղեցնող անձի այս հայտարարությունն Ադրբեջանի արտգործնախարար Ջեյհուն Բայրամովի ելույթի մեխն էր դարձել։ Հայաստանի փաստարկներին որպես հակափաստարկ հենց Փաշինյանի խոսքն էր ներկայացնում։ «Ուզում եմ խորհրդի ուշադրությունը հրավիրել այն փաստին, որ ընդամենը մի քանի ժամ առաջ Հայաստանի վարչապետն իր հայտարարության մեջ հերքեց բոլոր այս մեղադրանքները՝ հրապարակավ ընդունելով, որ Ղարաբաղում քաղաքացիական անձանց համար չկա ուղղակի սպառնալիք, և որ նրանց նկատմամբ զանգվածային ոճրագործությունների մասին պնդումները կեղծ են։ Սա, հիշեցնեմ, Հայաստանի վարչապետի հայտարարությունն է, որ արվել է 2 ժամ առաջ», - ասել է Բայրամովը։

Ադրբեջանցիների սրտի «վարչապետ» Փաշինյանին երեկ մեջբերել է նաև Ադրբեջանի նախագահի խորհրդական Հիքմեթ Հաջիևը, ընդգծել, թե Հայաստանի վարչապետն է ասել, որ Արցախում քաղաքացիական բնակչությունը չի տուժել։

Բնական է, ՄԱԿ ԱԽ նիստից առաջ Փաշինյանը հրաշալի գիտեր, թե ինչ թեզեր է ներկայացնելու իր իսկ նշանակած արտգործնախարարը։ Նման կարևորության ելույթները մշտապես նախնական քննարկում են անցնում երկրի ղեկավարի մակարդակով։ Արդ, ինչու՞ Փաշինյանը, մեղմ ասած, «քաշեց» Միրզոյանին, թուլացրեց նրա փաստարկների ամրությունը, կարճ ասած՝ իսկական դավաճանական քայլ կատարեց Հայաստանի դեմ։ Ապիկարությանն ու ոչ կոմպետենտությանը հղում անելն այլևս անլուրջ է, Փաշինյանն իր գոծունեությամբ ապացուցել է, որ սովորական դավաճան է, թուրք-ադրբեջանական նարատիվների առաջամարտիկ և յուրաքանչյուր քայլ կշռադատված անում է ընդդեմ Հայաստանի։

Լիանա Դիլարյան