Ո՞վ է շահագրգիռ, որ արցախցիների տարհանումը խափանեն

Հայաստանի վարչապետի պաշտոնը զբաղեցնող անձը տևական ժամանակ ֆեյսբուքի էջում չհայտնվելուց հետո այսօր երկու անգամ ուղիղ եթեր է մտել։ Մեկը՝ կապված Հայաստանի անկախության օրվա հետ, երբ սրտաճմլիկ և բազմաթիվ վտանգներով լեցուն մի ուղերձ հղեց, իսկ երկրորդ անգամ փորձեց իր վրայից դեն նետել լրջագույն մեղադրանքները, որոնք իր դեմ առաջադրվել են այս օրերին։

Արցախում տեղեկություններ են շրջանառվում, որ հազարավոր մարդիկ, որոնք հավաքվել են Իվանյանի օդնավակայանում Հայաստան տեղափոխելու համար, չեն կարող գալ, քանի որ Հայաստանի իշխանությունները դեմ են նրանց տարհանմանը։ Փաշինյանը մոտ կես ժամանոց տեսաուղերձով է հանդես եկել, հերքել բոլոր այս տեղեկությունները, հայտարարել, թե նման բան գոյություն չունի, ավելին փորձել ռուսների վրա բարդել այդ մեղքը, իբր նախորդ օրը 10 հազար մարդ հրավիրվել է Ստեփանակերտի օդանավակայան Հայաստան տարհանելու, տեսանկարել են, ինչից հետո ասել են, թե Հայաստանը թույլ չի տալիս, որ տեղափոխվեն։ «Ակնհայտ է, որ սա արվում է Հայաստանում ներքաղաքական ցնցումներ և քաոս առաջացնելու համար»,- հայտարարում է Փաշինյանը։

Իրականությունը, սակայն, այն է, որ արցախցիների տարհանումը խափանելու մեջ ամենամեծ շահագրգռությունն ունի հենց ինքը՝ Նիկոլ Փաշինյանը։ Այս օրերին Երևանում ընդդիմադիր շարժման ակտիվացմանը զուգահեռ նա ինքն էլ հրաշալի հասկանում է, որ տնավեր դարձած, հարազատներին և ողջ ունեցվածքը կորցրած արցախցիները Հայաստան գալու դեպքում լրջագույն խնդիր են դառնալու իր իշխանության համար, ուստի և փորձում են ամեն ինչ անել, նրանց Արցախում պահելու։

Ի դեպ այս հանգամանքն ինքն էլ չի հերքում՝ հայտարարելով, թե Հայաստանում մոտ 40 հազար ընտանիք տեղավորելու շուրջ նախապատրաստական աշխատանք են տարել, Նիկոլ Փաշինյանը նշում է, թե գործող իշխանությունների գնահատականն այն է, որ Արցախում Քաղաքացիական բնակչությանն ուղիղ սպառնալիք չկա, ավելին, նրանց անվտանգությունն ապահովելու պարտականությունը կրկին դրել է ռուս խաղաղապահների վրա։ Այն, որ ռուս խաղաղապահներն առանձնապես շահագրգռված չեն իրենց պարտականությունները կատարելու, թերևս որևէ մեկի համար գաղտնիք չէ, բայց Հայաստանի իշխանություններն իրենք պիտի շահագրգռված լինեին Հայաստանի քաղաքացի հանդիսացող արցախցիներին Հայաստան տեղափոխելու, նրանց համար անվազն մինիմալ պայմաններ ապահովելով։

Արցախցիներին Արցախում ամեն գնով պահելու մեջ միայն Փաշինյանը չէ, որ շահագրգռված է, շահագրգիռ է նաև Ադրբեջանը, որը մի կողմից ուզում է պահել նրանց, մյուս կողմից էլ փորձել աշխարհում տպավորություն ստեղծել, որ հենց Հայաստանն է ցանկանում էթնիկ զտում իրականացնել Ադրբեջանում՝ տարհանելով հայերին։ Շահագրգիռ կողմ է նաև Ռուսաստանը, որը հասկանում է, որ Արցախի հայաթափման դեպքում տարածաշրջանում իր դիրքերը լրջորեն խաթարվելու են։ Ահա այսպես ռուս–ադրբեջանական և նիկոլական շահերը համընկնում են։

Կարինե Բարսեղյան