Հայաստանյան ընդդիմությունը գնում է կրկին չարչրկված և ձախողված ճանապարհով
ՎԵՐԼՈՒԾՈՒԹՅՈՒՆՆԵՐ
Հայաստանյան ընդդիմությունը գնում է կրկին չարչրկված և ձախողված ճանապարհով։ Երեկ նախկին վարչապետ Վազգեն Մանուկյանը հրապարակել է այսպես կոչված «Ազգային կոմիտեի» կազմը՝ այնտեղ ընդգրկելով Հայկ Մամիջանյանին, Ավետիք Չալաբյանին, Անդրանիկ Թևանյանին, Իշխան Սաղաթելյանին և իրեն, ապա և հայտարարել, թե առավոտից բողոքի գործողություններ են անելու և կոլաբսի ենթարկելու Երևան քաղաքը։
Ոստիկանությունն, ի դեպ բավական ագրեսիվ է տրամադրված, երեկ երեկոյան մի քանի դեպքերում հարձակվել են երիտասարդների վրա, քաշքշել, հարվածներ հասցրել, դաժանաբար վերաբերվել և բերման ենթարկել, իսկ հանրությունն իսկապես հոգնել է ոչ միայն Փաշինյանից, այլ նաև ընդդիմության վաղուց արդեն մաշված հայտարարություններից և ցանկանում է հստակ, ռեալ գործողությունների գնալ։
Ամենևին չենք ցանկանում ընդդիմադիր շարժման ներկայացուցիչներին, կամ դրանց մի մասին մեղադրել Փաշինյանի հետ գործարքի գնալու մեջ, վստահ ենք, որ նրանք չափազանց ազնիվ մղումներ ունեն, սակայն փողոցային պայքարի տրամաբանությունը հուշում է, որ պետք է նոր մոտեցումներ որդեգրի Նիկոլ Փաշինյանի դեմ պայքարելու համար, առավել ևս, որ գործող վարչախմբին հաջողվել է հանրության բևեռացվածությունը հասցնել ծայրաստիճան ծանր վիճակի, դա է պատճառը, որ երեկ ագրեսիվ էին ոչ միայն ոստիականները, այլ նաև բազմաթիվ վարորդներ, որոնք անընդհատ կռիվներ էին հրահրում, սադրում փողոցը փակած երիտասարդներին։ Վերջիններս էլ տաքարյուն կերպով էին պատասխանում և շատերն արդեն իսկ ձերբակալվել են։
Հինգ տարվա ընթացքում Փաշինյանին հաջողվել է հանրությանն այնքան բևեռացնել, ատելություն սերմանել տարբեր հատվածների մեջ, որ հաջորդ իշխանությունն ահռելի մեծ աշխատանք ունի հանրային համերաշխության հասնելու հարցում։
Ժաննա Բեգլարյան
