Փաշինյանն ամեն ինչի պատրաստ է՝ հանուն իշխանության երկարաձգման

Սեփական իշխանությունը պահելու Փաշինյանի երևակայությունն ու ջանքերն արդեն դուրս են գալիս տրամաբանության բոլոր շրջանակներից։ Երեկ տեղի է ունեցել վարչապետի պաշտոնը զբաղեցնող անձի և Ռուսաստանի նախագահ Վլադիմիր Պուտինի հեռախոսազրույցը։ Պաշտոնական հաղորդագրությունը չափազանց աղքատիկ է։

Մեր աղբյուրների փոխանցմամբ, սակայն, Ռուսաստանի նախագահը պարզ և հստակ ակնարկել է, որ Փաշինյանը լուրջ խնդիրներ է ունենալու ոչ միայն սեփական երկրում, այլ նաև Ռուսաստանի հետ հարաբերություններում, քանի որ հատել է բոլոր կարմիր գծերը։ Այս հեռախոսազրույցից հետո, Երևանի կենտրոնում հավաքված ոստիկանները բազմահազար ցուցարարների նկատմամբ շարունակել են ուժ կիրառել, սադրանքներ իրականացնել և տասնյակ մարդկանց բերման են ենթարկել Տիգրան Մեծի պողոտայից։

Նիկոլ Փաշինյանը հանձնարարել է ուժային կառույցներին ամեն գնով պաշտպանել իրեն և իր իշխանությունը՝ խոստանալով լավ ծառայության դեպքում բարձրացնել պարեկների, ոստիկանների և այլ իրավապահ մարմինների ծառայողների պարգևավճարները։ Վերջիններս էլ ջանք ու եռանդ չէին խնայում Նիկոլ Փաշինյանի քմահաճույքներն իրականացնելու՝ շարքային ցուցարարների նկատմամբ դաժան ուժ կիրառելու համար։

Ակնհայտորեն Նիկոլ Փաշինյանը մտադիր է պայքարել մինչև վերջ, հրաշալի գիտակցում է, որ իշխանությունը կորցնելուց հետո արդեն ոչ միայն կարող է դատվել, այլ նաև անգամ ֆիզիկական գոյության հարց կարող է ծագել։

Այս իրավիճակում չափազանց տարօրինակ է գործող ընդդիմության վարքը։ Ընդդիմադիր առաջնորդները հնարավորինս փորձում են մեղմել վրդովված բազմության զայրույթը, այն տանել Փաշինյանի ցանկալի հունով։ Նման պայմաններում ընդդիմադիր թեժ պայքարը կրկին կարող է վերածվել դիմադրության շարժման հանրահավաքների, երբ մեկ ամիս քաղաքում ման տալուց հետո, մարդկանց ուղարկել էին իրենց տները։

Անահիտ Ղևոնդյան