Ադրբեջանը բացահայտել է իր իրական նպատակը
ՎԵՐԼՈՒԾՈՒԹՅՈՒՆՆԵՐ
Արցախի վրա ժամեր շարունակ հարձակումից հետո Ադրբեջանը բացահայտել է իր իրական նպատակը։ Ադրբեջանի նախագահի աշխատակազմը հաղորդագրություն է տարածել՝ հայտարարելով, թե պատրաստ են հանդիպել հայ բնակչության ներկայացուցիչների հետ Եվլախում, բայց պայման ունեն. «հակաահաբեկչական» միջոցառումների դադարի համար արցախյան կողմը պետք է բարձրացնի սպիտակ դրոշ, իսկ Արցախի իշխանությունները վերացվեն, հակառակ դեպքում օպերացիան շարունակվելու է մինչև վերջ, սպառնացել են Բաքվից։
Պաշտոնական Բաքուն տևական ժամանակ արցախի իշխանություններին մղում է ադրբեջանական որևէ քաղաքում, առանց միջազգային մեղանիզմի գործարկման բանակցությունների։ Բնական է, որ Ադրբեջան մեկնող ցանկացած արցախցի պաշտոնյա գտնվելու է լրջագույն ճնշման և հոգեբանական ճնշվածության վիճակում։ Ադրբեջանն օգտվում է միջազգային հանրության բացարձակ անտարբերությունից և առաջ տանում իր ցանկացածը։ Ոչ պակաս վատ են իրենց պահում նաև ռուս խաղաղապահներն ու Ռուսաստանի իշխանությունները, որոնք առանձնապես որևէ ջանք չեն գործադրում, թերևս այդկերպ փորձելով պատժել Նիկոլ Փաշինյանին, սակայն Փաշինյանի փոխարեն ավելի շատ պատիժը կրում են Արցախի 120 հազար բնակիչները։
Հավաքական Արևմուտքն էլ խստորեն դատապարտելու մասին հայտարարություններից և ՄԱԿ անվտանգության խորհրդում նիստ գումարելուց բացի որևէ այլ քայլ չի ձեռնարկել և առանձնապես ցանկություն էլ չունի ձեռնարկելու, ինչը վկայում է, որ Ադրբեջանին կանաչ լույս են տվել Արցախում էթնիկ զտումն իրականացնելու համար։
Արդյունքում 120 հազար բնակիչները, կամ ենթարկվելու են ցեղսպանության, կամ էլ ստիպված են լինելու լքել իրենց տները։ Բաքուն նույնիսկ այդ մասին է հոգ տարել, բնակչության տարհանումն ապահովելու նպատակով Լաչինի ճանապարհին և այլ ուղղություններով ստեղծել են «մարդասիրական միջանցքներ» և «ընդունման կետեր», իսկ Արցախի բնակիչներին բջջային հաղորդագրություներ են ուղարկել։ Ադրբեջանն ամեն ինչ անում է Արցախը հայաթափելու համար։
Ալինա Օհանյան
