Փաշինյանի խայտառակ պարտությունը և ցածր մասնակցության հետևանքները

Կենտրոնական ընտրական հանձնաժողովը հրապարակել է բոլոր 475 ընտրատեղամասերում ամփոփված Երևանի ավագանու ընտրությունների քվեարկության նախնական արդյունքները: Ըստ այդմ՝ 32,57 տոկոսով առջևում է իշխող «Քաղաքացիական պայմանագիր» կուսակցությունը, երկրորդը «Ազգային առաջընթաց»-ն է՝ 18,89 տոկոսով, երրորդը՝ «Մայր Հայաստան» դաշինքը՝ 15,43 տոկոսով, 11,32 տոկոսով չորրորդն է «Հանրապետություն» կուսակցությունը, հինգերորդը «Հանրային ձայն» կուսակցությունն է՝ 9,68 տոկոսով։

Ամենախայտառկ ցուցանիշը, որ գրանցվել է, մասնակցության թիվն է, 28,36 տոկոս։ Այսպիսի ցածր մասնակցություն Հայաստանի պատմության ընթացքում երբևէ չի եղել։ Իշխող վարչախումբն ամեն ջանք գործադրեց, որպեսզի մասնակցությունը հնարավորինս ցածր լինի, այդկերպ կարողանա վարչական ռեսուրսի, քրեականների և ընտրակեղծիքների կիրառմամբ բարձր տոկոսներ խփել, սակայն, ինչպես ասում են «խիյարը թարս բուսնեց»։

Այս պահի դրությամբ ՔՊ-ն և նրա կցորդ «Հանրապետությունը» միասին 32 մանդատ կարող են ստանալ, իսկ «Ազգային առաջընթացը», «Հանրային ձայնն» ու «Մայր Հայաստանը»՝ 33։ Ողջ ինտրիգն այն է՝ արդյո՞ք այդ ուժերը կգնան կոալիցիա կազմելու, թե՞ քաղաքապետ չի ընտրվի, և ստիպված կլինեն նոր ընտրություններ նշանակել։ Իսկ նոր ընտրությունները ՔՊ վերջն են լինելու։

Ցածր մասնակցությունը նաև ապացուցեց, որ Երևանի բնակչությունն ի սպառ մերժում է ընտրությամբ իշխանափոխության մեթոդը։ Այս փաստը պետք է լրջորեն մտահոգի իշխանությանը, որի ոտքերի տակից հողը փախչում է, և ընդդիմությանը, որը կարող էր ավելի լավ արդյունքներ ցուցաբերել, եթե միասնական և համախմբված մասնակցեր ընտրություններին։ 

Անահիտ Սարիբեկյան