Հայաստանի պետպարտքն աճում է, իսկ վարչախումբը թքած ունի

 Հայաստանի գործող իշխանության տարբեր մակարդակի ներկայացուցիչներն, այդ թվում ընդհուպ մինչև վարչապետի պաշտոնը զբաղեցնող Նիկոլ Փաշինյանը, սիրում են ներկայացնել բյուջեի տնտեսական զարգացման երկնիշ թվեր, հայտարարել, թե պետական բյուջեի եկամուտներն աճել են, սակայն որևէ խոսք չեն հայտնում Հայաստանի պետական պարտքի կտրուկ աճի վերաբերյալ։

Կառավարության ֆեյսբուքյան պաշտոնական էջը, օրինակ, նշում է, թե պետական բյուջեի եկամուտներն ավելացել են տասնյակ տոկոսներով։ Պետական պարտքի մասին որևէ արձանագրում ոչ կառավարության պաշտոնական կայքում և ոչ էլ սոցցանցային էջերում չհայտնաբերեցինք, իսկ Հայաստանի պետական պարտքը Նիկոլ Փաշինյանի օրոք աճել է ահռելի տեմպերով։ 2023 թվականի հուլիսի վերջի դրույթյամբ այն կազմում է մոտ 11 միլիարդ 352 միլիոն դոլար։ Ինչպես ցույց են տալիս ֆինանսների նախարարության տվյալները, տարեսկզբի համեմատ պետական պարտքն աճել է 714 միլիոն դոլարով, կամ 6,7 %-ով, ընդ որում այս ցուցանիշը կարող էր ավելի բարձր լինել, եթե դրամի արժևորում չլիներ։

Ըստ պաշտոնական տվյալների՝ ներքին պետական պարտքն ավելի արագ է աճում, քան արտաքին պարտքը, ինչը վկայում է, որ իշխանությունը պարտք է վերցնում հենց իր քաղաքացիներից և իրավաբանական անձանցից։ Արտաքին պետական պարտքը հուլիսի վերջի դրությամբ կազմել է 6 միլիարդ 663 միլիոն դոլար, որն այս տարվա 7 ամիսների ընթացքում աճել է 218 միլիոն դոլարով, կամ 3,4 %-ով, արտաքին պարտքի հիմնական մասը միջազգային կազմակերպություններից ու օտարերկրյա պետություններից ստացած վարկերն են։ Գործող իշխանությունները փորձում են տնտեսական աճի տեմպեր ցույց տալ բացառապես դրսից եկած տրանսվերտների և նորանոր վարկեր վերցնելու միջոցով։

Փաշինյանին Հայաստանի երկարաժամկետ շահը չի հետաքրքրում, նա կարճաժամկետ խնդիր է լուծում՝ առնվազն մնալ այնքան ժամանակ իշխանության ղեկին, մինչև կարողանա իր դրսի հովանավորներից անձնական ապահովության երաշխիքներ ստանալ, ուստի և պարտադրում է կառավարության պաշտոնյաներին հնարավորինս ավելացնել պետական պարտքի բեռը, որը, ի դեպ, մնալու է ոչ միայն մեր, այլ նաև մեր զավակների և թոռների վրա։ 

Լիանա Սահակյան