Փաշինյանն ու կողմնակիցները ստում են և չեն կարմրում
ՎԵՐԼՈՒԾՈՒԹՅՈՒՆՆԵՐ
Մինչ բազմաթիվ իրավապաշտպաններ, դիտորդներ, ընդդիմության ներկայացուցիչներ փաստերով, տեսանյութերով և այլ վկայություններով ապացուցում են, որ գործող իշխանությունը Երևանի ավագանու ընտրությունների քարոզարշավին ամբողջական կոլեկտիվներով են մարդկանց քշում քաղաքապետի ՔՊ-ական թեկնածուի հետ հանդիպմանը, Նիկոլ Փաշինյանն ու իր կողմնակիցները շարունակում են հերքել։
Երեկ Ազգային ժողովում պատասխանելով ընդդիմադիր պատգամավոր Գեղամ Նազարյանի այն դիտարկմանը, թե խոսում եք ժողովրդավարությունից, բայց մարդկանց պարտադրում եք գնալ նախընտրական հանդիպումների, նախկին ընդդիմադիր Փաշինյանը հայտարարել է, թե որևէ ներում, բեկում չի լինելու, եթե պարզվի, որ որևէ մակարդակի պաշտոնյա, որևէ աշխատողի վարչական լծակի օգտագործմամբ տանում է հանդիպման, հանրահավաքի, ընտրության, այդ պաշտոնյան ազատվելու է աշխատանքից։ «Ես ասում եմ որպես Հայաստանի վարչապետ, եթե պարզվի այդ մարդը իմ ամենահարազատ մարդն է, կդադարի լինել ամենահարազատ մարդը և կազատվի աշխատանքից», ասել է Փաշինյանը։
Այն, որ Փաշինյանի այս հայտարարությունը պարզ երեսպաշտություն է, որևէ մեկը չի կասկածում, նույնիսկ իրենք՝ «Քաղպայմանագրի» ներկայացուցիչները, որոնց մի մասը, եթե ամոթ ունենար կկարմրեր հենց Ազգային ժողովի նիստերի դահլիճում, ընդհակառակը, մեզ բազմաթիվ ահազանգեր են գալիս, որ ամբողջական դպրոցների կոլեկտիվների պարտադրում են ներկայանալ թեկնածուի հետ հանդիպմանը, ընդ որում այս անգամ նոր մարտավարություն են ընդունել, աշակերտների ծնողներին չեն պարտադրում գալ այդ հանդիպումներին՝ վախենալով, թե կարող է տեղեկությունը փաստագրվել և հայտնվել ընդդիմության, կամ անկախ դիտորդների ձեռքում, ուստի և ընդամենը փորձում են այնպես անել, որպեսզի հնարավորինս քիչ աղմուկ բարձրանա, բայց նույնիսկ այդ դեպքում փաշինյանական վարչախմբի ներկայացուցիչներն իրենց ապիկարության պատճառով չեն կարողանում խուսափել աղմուկից։
Հայաստանի Հանրապետության ընտրողները կարող են իրենց աչքով համոզվել, տեսնել, թե ինչ ստախոս իշխանություն ունեն և արդյոք պետք է շարունակել այդ ստախոս իշխանությանը թողնել երկրի ղեկին։ Միթե՞ փաշինյանական վարչախմբի բերած արհավիրքները բավարար չէին Հայաստանի Հանրապետությանը։
Նարինե Կարապետյան
