«Քաղպայմանագրում» խուճապ է. փորձում են կամուրջներ հաստատել ընդդիմադիրների հետ

Շաբաթներ առաջ տեղեկություններ էինք հայտնել, որ Երևանի վարչական շրջանների ղեկավարներից երեքը հանդիպում են ունեցել «Ապրելու երկիր» կուսակցության ներկայացուցիչների հետ։ Մեր աղբյուրների փոխանցմամբ՝ «Քաղպայմանագրում» ճշտել են այս տեղեկությունը, հաստատել դրա իսկությունը և փորձել են ծածկադմբոց անել, սակայն տեղեկությունը տարածվել է և «Քաղպայմանագրում» իրական խուճապի առիթ է դարձել։

Իշխող ուժերի բազմաթիվ ներկայացուցիչներ, որոնք դեռ շարունակում են մնալ ՔՊ կազմում, հստակ գիտակցում են, որ Փաշինյանին չափազանց կարճ ժամանակ է մնացել և հասկանում, որ իրենք իշխանափոխությունից հետո կարող են հայտնվել հանրության և նոր իշխանությունների թիրախում, ուստի և այսօրվանից փորձում են կամուրջներ գծել ընդդիմադիր առաջատար միավորների հետ։

Մեր աղբյուրի փոխանցմամբ՝ օրեր առաջ արդեն ՔՊ խմբակցության 6 պատգամավորներ Արագածոտնի մարզում գաղտնի հանդիպել են «Ապրելու երկիր» կուսակցության համանախագահ, Երևանի ավագանու ընտրություններում քաղաքապետի թեկնածու Մանե Թանդիլյանի և Կուսակցության շտաբի պետ Մեսրոպ Առաքելյանի հետ։

Ի դեպ աղբյուրը հայտնում է, որ քպականները հանդիպում են ոչ միայն «Ապրելու երկրի», այլ նաև նույնիսկ «Մայր Հայաստան» դաշինքի և քաղաքապետի թեկնածու Հայկ Մարությանի հետ, համոզում, թե իրենք առանձնապես շահագրգռված չեն Փաշինյանի և նրա քաղաքական թիմի հաջողությամբ Երևանի քաղաքապետի ընտրություններում, խոստանում, որ առաջին իսկ հնարավորության դեպքում կանցնեն ընդդիմության կողմը։ Նման տեղեկությունները Փաշինյանը փորձում է թաքցնել իր կուսակիցներից, սակայն ապարդյուն, «Քաղպայմանագրում» առաջիկայում կենտրոնախույզ ձգտումները շարունակվելու են։

Արինա Բարսեղյան