«Վագներն» ու Փաշինյանի ստերը
ՎԵՐԼՈՒԾՈՒԹՅՈՒՆՆԵՐ
Իր արտաքին և ներքին հարցերը լուծելու համար փաշինյանական վարչախումբը մշտապես է դիմում տարբեր սադրանքների։ Թերևս կարելի է փաստել, որ այս հանգամանքը դարձել է Նիկոլ Փաշինյանի իշխանության այցեքարտը։ Այսօր էլ Երևանի ավագանու ընտրություններին ընդառաջ Փաշինյանը փորձում է հանրությանն ահաբեկել՝ նոր ապատեղեկատվություններ տարածելով, ընդ որում վերջին ապատեղեկատվությունը ոչ միայն ներքին, այլ նաև աշխարհաքաղաքական խնդիրներ լուծելու համար է։ Կառավարությանը մերձ կանգնած տելեգրամյան ալիքներից մեկով երեկ սկսվեց, ապա և այլ մեդիառեսուրսներով տարածվեց մի տեղեկություն, որը իրազեկ մարդկանց մոտ միայն քմծիծաղ կարող է առաջացնել, սակայն շատերին կարող է ահաբեկել։ Ըստ էության, առանց որևէ փաստական հենքի, սկսեցին տարածել՝ իբր Հայաստանում է գտնվում «Վագներ» խմբավորման մի քանի հազար մարտիկներ։ Մի դեպքում նշում էին 5, մեկ այլ դեպքում՝ մինչև 12 հազար մարտիկներ։
Ավելին, որպեսզի այդ տեղեկությունն ավելի արժանահավատ թվա և ուժգին ազդի հանրության վրա, իշխանականներն անգամ թվեր էին գրում, թե այդ մարտիկների մի մասը Ռուսաստանից ժամանած հայեր են։ Հաշվի առնելով վերջին շրջանում «Վագներ» խմբավորման շուրջ ստեղծված տեղեկատվական աղմուկը, ինչպես նաև Ռուսաստանում տեղի ունեցած խռովության փորձը, հարկավոր է ընդգծել, որ Փաշինյանի այս ապատեղեկատվական սադրանքի ազդեցությունը բնավ էլ պետք չէ թերագնահատել։ Իշխանական քարոզիչները փորձում են համոզել, թե այս կերպ իբր վտանգում են Հայաստանի ինքնիշխանությունը։ Մեծ հավանականությամբ խնդիր է դրված ոչ միայն ընտրություններին ընդառաջ հանրությանն ահաբեկելու, այլ նաև աշխարհաքաղաքական կոնկրետ խնդիր լուծելու։
Հայ-ռուսական լարված հարաբերությունների ֆոնին, Նիկոլ Փաշինյանն այսպիսի կեղծ տեղեկություններով նաև փորձում է առևտրի մեջ մտնել Արևմուտքի հետ և իր անվտանգությունն իշխանության վերարտադրման համար Հայաստան զինված խմբավորումներ բերել Արևմուտքից՝ պատճառաբանելով, թե այդ կերպ պայքարելու է «Վագների» կամ նմանատիպ այլ խմբավորումների դեմ։ Ինքը՝ Փաշինյանը, վաղուց այլևս այրել է բոլոր կամուրջները Ռուսաստանի հետ և հասկանում է, որ միայն Արևմուտքի անմիջական և զինված ներգրավմամբ կկարողնա ևս որոշակի ժամանակ պահպանել իշխանությունը։
Մարգարիտա Բայրամյան
