Դաշնային խորհրդում կոչ են արել Հայաստանին չկրկնել Ուկրաինայի ճանապարհը
ՎԵՐԼՈՒԾՈՒԹՅՈՒՆՆԵՐ
News.ru-ն գրում է, որ ՆԱՏՕ-ին Հայաստանի անդամակցության հարցը որոշում է երկրի ղեկավարությունը, սակայն դա չի բարելավի իրավիճակը Հարավային Կովկասում և չի օգնի Երևանին անվտանգության խնդիրները լուծելու հարցում: NEWS.ru-ի հետ զրույցում նման կարծիք է հայտնել ՌԴ Դաշնային խորհրդի միջազգային կոմիտեի ղեկավարի տեղակալ, սենատոր Վլադիմիր Ջաբարովը։
«ՆԱՏՕ-ն ագրեսիվ և բացարձակապես ապակայունացնող կառույց է, որը զբաղված է բացահայտ ռուսաֆոբ արարքներով։ ՆԱՏՕ-ին Հայաստանի անդամակցության հարցը որոշում է երկրի ղեկավարությունը, բայց ես չեմ կարծում, որ դա կբարելավի իրավիճակը Հարավային Կովկասում և կօգնի Հայաստանին լուծել անվտանգության խնդիրները։ Եթե կասկածներ կան, թող նայեն Ուկրաինայի իրավիճակին։ Այնտեղ ավելի ապահո՞վ դարձավ այն բանից հետո, երբ Ուկրաինան ցանկացավ անդամակցել ՆԱՏՕ-ին և այդ ագրեսիվ դաշինքին հնարավորինս մոտենալու քաղաքականություն վարեց»,- ասել է Ջաբարովը:
Սենատորը հույս է հայտնել, որ հայ ժողովուրդը ճիշտ որոշում կկայացնի։ Ջաբարովը հիշեցրել է, որ Հայաստանը Ռուսաստանի ամենամոտ դաշնակիցն է Հավաքական անվտանգության պայմանագրի կազմակերպությունում (ՀԱՊԿ), ինչպես նաև Եվրասիական տնտեսական միության (ԵԱՏՄ) անդամ է։
Հիշեցնենք, որ ՆԱՏՕ-ի ընդլայնման եվրոպական կոմիտեի նախագահ Գյունթեր Ֆելինգերը կոչ էր արել Հայաստանին միանալ Հյուսիսատլանտյան դաշինքին։ Այդ խնդրանքով դաշինքի ներկայացուցիչը դիմել է երկրի վարչապետ Նիկոլ Փաշինյանին հավելելով, որ ԱՄՆ նախագահ Ջո Բայդենը «կպաշտպանի Հայաստանը»։
Նյութը հրապարակման պատրաստեց Կամո Խաչիկյանը
