Քաղաքագետ Մարկովը գնահատել է Հայաստանին ՆԱՏՕ հրավիրելու հայտարարությունը
ՎԵՐԼՈՒԾՈՒԹՅՈՒՆՆԵՐ
Rambler.ru-ն գրում է, որ քաղաքագետ Սերգեյ Մարկովը Ռամբլերի հետ զրույցում գնահատել է ՆԱՏՕ-ի զարգացման եվրոպական կոմիտեի նախագահ Գյունտեր Ֆելինգերի հայտարարությունը, ով Հայաստանին առաջարկել է միանալ Հյուսիսատլանտյան դաշինքին։
Հիշեցնենք, որ ավելի վաղ Ֆելինգերը X սոցցանցում (նախկինում Twitter) գրառում էր կատարել, որտեղ կոչ էր անում Հայաստանին միանալ դաշինքին երկիրը «պաշտպանելու» համար։ Միաժամանակ, հանրապետության արտաքին գործերի նախարարության ղեկավարի տեղակալ Վահան Կոստանյանը նշել է, որ Ֆելինգերը դաշինքի ներկայացուցիչ չէ, այլ միայն հասարակական կազմակերպության ղեկավար, որի անունով հապավումը պարունակում է «ՆԱՏՕ» բառը: Նրա խոսքով, ներկայումս ՆԱՏՕ-ին Հայաստանի անդամակցության մասին խոսք չկա, սակայն երկիրը մտադիր է շարունակել համագործակցությունը դաշինքի հետ։
«Հայաստանի ԱԳՆ-ն ճիշտ է նշել, որ այդ անձը ՆԱՏՕ-ի ներկայացուցիչ չէ։ Դատելով իր պաշտոնից Ֆելինգերը Եվրախորհրդարանում կամ Եվրահանձնաժողովում պատասխանատու է ԵՄ-ի և ՆԱՏՕ-ի բյուրոկրատական կառույցների համագործակցության համար։ Իսկ ինչ վերաբերում է Հայաստանին դաշինք հրավիրելուն, ապա դա սկզբունքորեն հնարավոր է, քանի որ առաջին հերթին Ֆրանսիան և մասամբ ԱՄՆ-ն իրենց առջև խնդիր են դրել քաղաքականապես մեկուսացնել Ռուսաստանին։ Իսկ դրա համար պետք է Ռուսաստանից «պոկել» իր բոլոր քաղաքական դաշնակիցներին։ Ուստի կարծում եմ, որ Ֆելինգերի նման քայլը պահանջված կլինի ՆԱՏՕ-ի, ինչպես նաև Հայաստանի քաղաքական ղեկավարության կողմից»,- ասել է Սերգեյ Մարկովը։
Հայաստանի իշխանությունները հասկանում են, որ Լեռնային Ղարաբաղի հակամարտությունում երկիրը պարտվում է Ադրբեջանին, նշել է փորձագետը։ «Եվ նրանք կփորձեն գտնել մի քանի այլ դաշնակիցներ... Ռուսաստանը չի ցանկանում հանուն Հայաստանի շահերի կռվել Ադրբեջանի հետ, և հիմա Երևանն այլ տարբերակներ է փնտրում։ ԻՍԿ հնարավոր տարբերակներից մեկը ՆԱՏՕ-ն է»,- ասել է քաղաքագետը։
Մարկովն ընդգծել է, որ Ֆելինգերի հայտարարությունը «քննարկում է բացում ՆԱՏՕ-ին Հայաստանի հնարավոր ապագա անդամակցության մասին»։ Միաժամանակ փորձագետը բացառեց տեսանելի ապագայում Հայաստանի պաշտոնական անդամակցության հնարավորությունը ՆԱՏՕ-ին։ «Կա Թուրքիան, որը թշնամական հարաբերություններ ունի Հայաստանի հետ, և նա միանշանակ կխոչընդոտի ՆԱՏՕ-ին Հայաստանի հնարավոր անդամակցությանը, նույնիսկ կխոչընդոտի ՆԱՏՕ-ին անդամակցության գործողությունների ծրագրի ընդունումը: Սակայն ներկա պայմաններում Հայաստանի «ոչ ֆորմալ սողանքներով Դաշինք մտնել» հնարավոր է, ինչպես Ուկրաինայի դեպքում: Հայտնի է, որ Ուկրաինան ՆԱՏՕ-ի անդամ չէ, բայց ՆԱՏՕ-ն, պայմանական ասած, Ուկրաինայի անդամ է»,- եզրափակել է Մարկովը:
Նյութը հրապարակման պատրաստեց Կամո Խաչիկյանը
