«Գործընթացը հեռանում է. ինչի՞ կհանգեցնի Ղարաբաղի նախագահի հրաժարականը»
ՎԵՐԼՈՒԾՈՒԹՅՈՒՆՆԵՐ
Iz.ru-ն գրում է, որ Լեռնային Ղարաբաղում (ԼՂՀ) հումանիտար իրավիճակը գնալով վատթարանում է: Ալյուրի դեֆիցիտի պատճառով անգամ սովորական հացն է դարձել դեֆիցիտ, իսկ չճանաչված հանրապետության բնակիչների շրջանում սովային ուշագնացություններն ավելի հաճախակի են դարձել։ Այդ ֆոնին ԼՂՀ նախագահ Արայիկ Հարությունյանը խոստացել է հրաժարական տալ։ Նրա խոսքով, ներկա աշխարհաքաղաքական պայմաններում քաղաքական ճկունություն է պահանջվում: Փորձագետները կարծում են, որ այդ հրաժարականը կլինի առաջին քայլն Ադրբեջանի պահանջների կատարման, Լեռնային Ղարաբաղի կործանման ուղղությամբ։
Կովկասագետ Արթուր Աթաևն ասել է, որ Բաքուն կարող է փորձել լուծել Ղարաբաղի հետ կապված բոլոր հարցերն ուժով։ «Ադրբեջանը, որպես հռետորական հնարք, խոսում է Աղդամով ճանապարհ բացելու մասին։ Կարծում եմ, որ իրականում այն չի բացվելու, քանի որ երկիրը պատրաստվում է զինված սրացման։ Բաքուն նախատեսում է ջախջախել Ղարաբաղի զինված ուժերին, դատել չճանաչված հանրապետության գլխավոր ղեկավարներին և ԼՂՀ այն բնակիչներին, ովքեր մասնակցել են Ղարաբաղյան առաջին և երկրորդ պատերազմներին։ Պարզ ասած մաքրել մարզի տարածքը»,- նշել է նա։
Ռազմավարական մշակույթի հիմնադրամի փորձագետ Անդրեյ Արեշևն էլ կարծում է, որ Ադրբեջանը զերծ կմնա ուժի կիրառումից։ «Նախ, սրացմանը խոչընդոտում են ռուս խաղաղապահները։ Երկրորդ հերթին Բաքուն կարող է հասնել իր բոլոր նպատակներին նույնիսկ առանց ուժի կիրառման։ Ղարաբաղի հայերի կյանքն արդեն շատ դժվար է, և այն կարող է էլ ավելի բարդանալ։ Ճնշումները կմեծանան, հայերը ստիպված կլինեն լքել տարածաշրջանը»,- ընդգծել է զրուցակիցը։
ՄԳԻՄՕ-ի Կովկասյան խնդիրների և տարածաշրջանային անվտանգության կենտրոնի առաջատար գիտաշխատող Նիկոլայ Սիլաևը Հարությունյանի հրաժարականը հուսահատության ժեստ է անվանել։ «Չճանաչված հանրապետության իշխանությունները փակուղու մեջ են: Շրջափակման խնդիրը լուծված չէ, Ստեփանակերտն արտաքին աջակցություն չի ստանում: Ադրբեջանը տասնամյակներ շարունակ պահանջում է լուծարել Լեռնային Ղարաբաղի ուժային կառույցները։ Հարությունյանի հրաժարականը կարծես քայլ է այս պահանջի կատարման ուղղությամբ»,- ասել է նա։
Նյութը հրապարակման պատրաստեց Կամո Խաչիկյանը
