Արցախում նախագահ են ուզում ընտրել, իսկ Փաշինյանը սրում է իրավիճակը

Արցախի խորհրդարանն արդեն ամսի 9-ին կընտրի նոր նախագահ։ Դեռևս Արցախի խորհրդարանական ուժերը չեն բացահայտում, թե ում են առաջադրելու Արցախի նախագահի պաշտոնում, սակայն Արայիկ Հարությունյանի հրաժարականից և պետնախարարի պաշտոնում անվտանգության խորհրդի քարտուղար Սամվել Շահրամանյանի նշանակումից հետո գրեթե բոլորը միաբերան նշում են, որ հենց Շահրամանյանն էլ լինելու է Արցախի հաջորդ նախագահը։ Միակ քաղաքական ուժը, որը դեմ է այս զարգացումներին Արցախում անվտանգության խորհրդի նախկին քարտուղար Սամվել Բաբայանի գլխավորած «Միասնական հայրենիք» կուսակցությունն է, որը թեկնածու չի առաջադրի, քվեարկությանը չի մասնակցի, իսկ նախագահի ընտրության օրը մտադիր են Ստեփանակերտում ակցիա անցկացնել։

Նախօրեին նա հայտարարել է, թե ոչ ոք չպետք է նկուղներում որոշի, թե ով է դառնալու Արցախի նախագահը, ուստի և Արցախի բանկիչներին կոչ է արել բողոքի ակցիայի դուրս գալ։ Այն, որ Սամվել Բաբայանն առանձնապես մեծ հեղինակություն և հարգանք չի վայելում Արցախում պարզից էլ պարզ է։ Բաբայանը, ընդհակառակը, ուղարկվել է Արցախ Նիկոլ Փաշինյանի կողմից, իրավիճակը թեժ պահելու և իր վերահսկողությունն ապահովելու համար, ուստի, բնականաբար զարմանալի չէ, որ Արցախում ընթացող ներքաղաքական պրոցեսներից խորհրդարանում 9 պատգամավոր ունեցող քաղաքական ուժին աշխատում էին հեռու պահել, ընդդիմությունը և իշխող «Ազատ հայրենիք» խմբակցությունն իրար հետ էին որոշում, թե ինչ պետք է անել և ինչպես պետք է մասնակցել, այդ կապակցությամբ էլ Արցախի Ազգային ժողովի նախագահ դարձավ ամենափոքր խմբակցություններից մեկի ՀՅԴ-ի ներկայացուցիչը։

Ակնհայտ է, որ Սամվել Բաբայանը, որն ակտիվորեն առաջ է տանում Ադրբեջանի հետ համագործակցելու և ինտեգրվելու գաղափարը, փորձելու է այս անգամ էլ սրել իրավիճակը և բանը հասցնել ընդհուպ բախումների։ Արցախի նախագահին կից Հակաճգնաժամային խորհրդի նախագահ Տիգրան Պետրոսյանն արդեն իսկ հայտարարել է, որ եթե Արցախում արյուն հեղվի, իսկ դրա նախանշաններն առկա են, ապա այդ արյունն Արայիկ Հարությունյանի վզով է մնալու։ Տիգրան Պետրոսյանին, նշենք, ժամանակին այդ պաշտոնում պարտադրել էր նշանակել հենց Նիկոլ Փաշինյանը։ Արցախում չափազանց փոքր հենարան ունեցող Հայաստանի գործող վարչախումբը, բնականաբար իրավիճակը փորձելու է օգտագործել Արցախում իր ազդեցությունը չկորցնելու և ադրբեջանական նարատիվներն առաջ տանելու համար, իսկ Սամվել Բաբայանն այդ առումով «հրաշալի» թեկնածու է։

Անահիտ Սաֆարյան