«Դա անսպասելի որոշում էր». Վարդանյանը Ղարաբաղի ղեկավար Հարությունյանի հրաժարականի մասին
ՎԵՐԼՈՒԾՈՒԹՅՈՒՆՆԵՐ
Rtvi.com-ը գրում է, որ Արցախի նախկին պետնախարար Ռուբեն Վարդանյանն «անսպասելի» է անվանել չճանաչված Լեռնային Ղարաբաղի Հանրապետության (ԼՂՀ) նախագահ Արայիկ Հարությունյանի հրաժարականի որոշումը։ RTVI-ի հետ զրույցում Վարդանյանը կիսվել է իր կարծիքով։
«Արայիկ Հարությունյանի հրաժարականի հարցը բազմիցս քննարկվել է, սակայն նրա որոշումն անսպասելի էր։ Նա անցել է Արցախի անկախության համար մղվող պայքարի ողջ ուղին և ունի մեծ փորձ, ինչն Ադրբեջանում համապատասխան արձագանք է առաջացնում»,- ասել է Վարդանյանը։
Հիշեցնենք, որ Լեռնային Ղարաբաղի Հանրապետության նախագահ Արայիկ Հարությունյանը սեպտեմբերի 1-ին հրաժարական է տվել։ Որոշումը, նրա խոսքով, ընդունվել է հաշվի առնելով «վերջին շաբաթների ընթացքում բոլոր ներքին ու արտաքին խաղացողների և լայն հասարակության հետ փոխգործակցությունը»։ Բացի այդ, Հարությունյանը հրամանագիր է ստորագրել Գուրգեն Ներսիսյանին կառավարության ղեկավարի պաշտոնից ազատելու մասին և այդ պաշտոնում նշանակել Անվտանգության խորհրդի քարտուղար Սամվել Շահրամանյանին, որին տրվել են «լայն լիազորություններ»։
Վարդանյանն ընդգծել է, որ ցանկացած հրաժարական «թեկուզ խաղաղ պայմաններում» մեծ սթրես է։ Բայց նա համոզված է, որ Լեռնային Ղարաբաղը կառավարած ղեկավարությունը, ինչպես նաև իշխանության նոր ներկայացուցիչները կկարողանան «արժանի կերպով լուրջ փորձություններ անցնել հանրապետության համար ծանր պահին»։
Ինքը՝ Վարդանյանը, չի նախատեսում առաջադրվել նախագահի պաշտոնում։ «Արցախ եմ եկել ոչ դրա համար: Ես եկել եմ այստեղ, որպեսզի արցախցիների հետ միասին անեմ ամեն ինչ, որպեսզի Արցախը մնա հայկական, ազատ, ապահով և երջանիկ ոչ միայն այսօրվա սերնդի, այլ նաև հազարավոր տարիներ այստեղ ապրած հայերի բազմաթիվ սերունդների համար»,- ասել է նա։
Ռուբեն Վարդանյանը նաև խոսել է Արցախի շրջափակման մասին և ընդգծել, որ Արցախի ավելի քան 120 հազար բնակիչներ պետք է կարողանան «ազատ տեղաշարժվել միջանցքով», ինչպես նաև «կարողանան ապահով կերպով արտադրանք ստանալ»։ Այժմ, ինչպես նշել է Վարդանյանը, Ադրբեջանը ոտնահարում է Արցախի ժողովրդի բոլոր իրավունքները՝ «աշխատելու, սովորելու, ապրելու և ազատ տեղաշարժվելու»։
Վարդանյանը նաև պնդել է, որ Ադրբեջանն արհեստականորեն հումանիտար ճգնաժամ է ստեղծում, որպեսզի «Արցախի Հանրապետությանը ստիպի հրաժարվել սեփական օրենքներով սեփական հողի վրա ապրելու իրավունքից»։
«Ադրբեջանը նախ շրջափակում է անում՝ հումանիտար աղետ ստեղծում, հետո փորձում ստիպել մարդասիրական օգնություն ստանալ։ Ինչ-որ տարօրինակ համակարգ է՝ ստիպել մարդկանց վերացնել խնդիրը հենց իր ստեղծողի օգնությամբ, իսկ հետո սպառնալ պատիժներով, եթե դա չանեն: Ինձ թվում է սա ընդհանրապես աբսուրդի թատրոն է, սա ծաղր է մարդկային և միջազգային իրավունքի բոլոր նորմերի նկատմամբ»,- հավելել է Վարդանյանը։
Արցախի նախկին պետնախարարի խոսքով Բաքվի որոշումների վրա կարող են ազդել հենց իրենք՝ արցախները, Հայաստանի ղեկավարությունը, միջազգային հանրությունը և երեք երկրների միջև համաձայնագրի մաս կազմող Ռուսաստանը։
Նյութը հրապարակման պատրաստեց Կամո Խաչիկյանը
