Ղրիմի վետերան. Արևմուտքը տեղեկատվական հարձակման է ենթարկում Ռուսաստանին Ղրիմում Փաշինյանի սցենարով
ՎԵՐԼՈՒԾՈՒԹՅՈՒՆՆԵՐ
Politnavigator.net-ը գրում է, որ վերջին մի քանի շաբաթվա ընթացքում Ղրիմը ենթարկվել է պայթյունների, դիվերսիաների և անդրուկրաինական ընդհատակի գործողությունների մասին կեղծ հաղորդագրությունների, ինչը պետք է լարված իրավիճակ պահպանի թերակղզում: Խցանումները Ղրիմի կամրջում, որը սովորական է ամեն տարվա օգոստոսի վերջին հանգստացողների հեռանալու պատճառով, ավանդաբար մեկնաբանվում են որպես Ղրիմից ռուսների զանգվածային արտահոսքի արդյունք:
Ռազմական փորձագետ Բորիս Ռոժինը Krym 24-ի եթերում բացատրել է, որ նման կեղծիքները կարող են ունենալ մի քանի նպատակ, բայց հիմնական երկուսը պաշտոնական տեղեկատվության նկատմամբ անվստահություն առաջացնելն ու խուճապ սերմանելն է։ «Ֆեյքերն ուղղված են ինչպես բնակչությանն ընդհանրապես, այնպես էլ որոշակի տարածքների բնակիչներին մասնավորապես։ Հետևաբար, դրանք հաճախ ունեն տարածաշրջանային բնույթ: Ֆեյքերը սովորաբար միտված են խուճապ սերմանելուն, անվստահություն առաջացնելուն իշխանությունների պաշտոնական հայտարարությունների, ծառայությունների, պաշտպանության նախարարության նկատմամբ։ Ապատեղեկատվության լցոնման ընթացքում լուծվում են տարբեր խնդիրներ։ Որպես կանոն, կա՛մ ամբողջովին կեղծ, կա՛մ կեղծիքի խառնուրդ է շպրտվում ինչ-որ իրական տեղեկատվության հետ, և այդ ամենը միտված է ինչ-որ էմոցիոնալ ազդեցության։ Այս հիմքի վրա նրանք ինչ-որ կերպ փորձում են ցնցել հասարակությանը։ Որպես կանոն, նույնիսկ առանձին լոկալ ֆեյքերը ներկառուցվում են ինչ-որ ընդհանուր տեղեկատվական համակարգում և բնակչության վրա հոգեբանական ազդեցություն թողնում»,- ասել է նա։
Ղրիմի Պետխորհրդի պատգամավոր, Ժողովրդական Միլիցիայի կոմպոզիտային գնդի վետերանների միության նախագահ Արմեն Մարտոյանն էլ հավելել է, որ նույն սկզբունքով էին Հայաստանում տեղեկատվական լցոնումներ կատարվել 2018 թվականի «գունավոր հեղափոխության» ժամանակ։
«Այդ ձեռագիրն ինձ հայտնի է Հայաստանում, այսպես կոչված, հեղափոխության օրերից։ Դա Սորոսի ոճն է, դա արևմտյան ոճն է՝ հավաքագրել և սովորեցրել երիտասարդներին ստեղծագործել հիմնվելով սենսացիոն տեղեկատվության վրա: Հատուկ կառույցները թեմաներ են մշակում այն ամենի հիման վրա, ինչը կարող է խաթարել բնակչության հոգիները, խուճապ սերմանել։ Եվ նրանք սկսում են զարգացնել իրենց կեղծ տեղեկատվությունը: Նրանք գտնում են այն պահերը, որոնք կարող են բնակչությանը տանել շոկի, վախի, խուճապի պատճառ դառնալ։ Սրանք իսկապես գործիքներ են՝ կարևոր և արդյունավետ։ Դրանում միջոցներ են ներդրվում, ընտրվում են կոմպետենտ մարդիկ, քանի որ պետք է խուճապ սերմանել։ Ո՞րն է ամենավատը կռվի, պատերազմի ժամանակ։ Շատ սարսափելի բաներ են, եթե մարդիկ կորցնում են հավատը երկրի ղեկավարության նկատմամբ, կասկածի տակ են դնում նրա գործողությունները, սկսում են խուճապի մատնվել և տարածել դա իրենց ընտանիքների, հարևանների, շրջապատի բոլոր մարդկանց վրա չհասկանալով, որ իրականում այդ ամենը սուտ է: Իսկ Ղրիմի անվտանգությունը նույն Եվրոպայի հետ համեմատած շատ ավելի բարձր է»,- ընդգծել է Մարտոյանը։
Նյութը հրապարակման պատրաստեց Կամո Խաչիկյանը
