ՔՊ-ն փորձում է նվազեցնել ընտրությունների մասնակցության թիվը

Երևանի ավագանու ընտրություններում քարոզարշավի առաջին շաբաթը չափազանց ծանր է անցնում «Քաղպայմանագրի» թեկնածու Տիգրան Ավինյանի համար։

Այլևս հստակ է, որ նրա քարոզարշավին փոքր-ինչ գեղագիտական և հաճելի տեսք տալու համար զանգվածաբար տարբեր մարդկանց են բերում և վարժեցնում, որպեսզի մոտենան և ջերմ զրույցի բռնվեն Ավինյանի հետ, իսկ երեկ Աջափնյակում այս գործողությունն ընդհանրապես դուրս է եկել վերահսկողությունից։ Բազմաթիվ ընտրողներ պարզապես վիրավորել և քննադատել են Տիգրան Ավինյանին, նրա դեմքին ասել այն ամենն ինչ մտածում են։ Հաշվի առնելով այս զարգացումները՝ «Քաղպայմանագրը» որոշել է գնալ իր նախանշած մեկ այլ ճանապարհով։

Այս օրերին թաղապետարանների աշխատակիցներն ու ոստիկանները տնետուն ընկած իբր ցուցակներ են ճշտում, միաժամանակ քարոզչական թեզեր տարածում Երևանի ավագանու ընտրություններում մասնակցությունը հնարավորինս պակասեցնելու համար, մասնավորապես փորձում են հիասթափություն առաջացնել հանրության մեջ, համոզել, թե ամեն ինչ նախանշված է, ամեն ինչ որոշված է, այս խառը պահին ընտրություններ անելու իմաստ չկա, ընտրություններին մասնակցել ընդհանրապես չարժե։ Բնականաբար, այս քարոզչությունը համեմում են գործող իշխանությունների հասցեին որոշակի քննադատությամբ, որպեսզի մարդկանց մոտ տպավորություն ստեղծվի, թե ընդդիմությունն ինքն է շահագրգռված ընտրություններին չմասնակցելով։

«Քաղպայմանագրում» հրաշալի հասկանում են, որ որքան ցածր լինի մասնակցության թիվն ընտրություններին, այնքան ավելի մեծ հնարավորություն կունենան մեծ տոկոսներ ստանալ ընտրությունների ժամանակ, ուստի և ընտրություններին մասնակցող իրական ընդդիմադիրների խնդիրն է հանրությանը բացատրել և հասկացնել, որ ցանկացած մեկը, ով նույնիսկ հիասթափված է Նիկոլ Փաշինյանից և նրա ապիկար ու դավաճան թիմից, ընտրություններին չմասնակցելով փաստացի ձայն է տալիս հենց այդ նույն թիմին։

Երևանի ավագանու ընտրություներում Փաշինյանի հաղթանակը կանխելու և Երևանում, ապա և ողջ հանրապետությունում իշխանափոխություն անելու միայն մեկ եղանակ կա՝ անպայման մասնակցել Երևանի ավագանու ընտրություններին և քվեարկել «Քաղպայմանագրի» դեմ։ 

Անահիտ Անանյան