Ի՞նչ է հետևելու Ֆրանսիայի քայլին. կուլ կտա՞ Փարիզը Բաքվի հարվածը

Արցախին հումանիտար օգնություն հասցնելու ֆրանսիական նախաձեռնությունն ինչպես և սպասվում էր առժանացավ մյուս բեռնատարների ճակատագրին։ Փարիզից Երևան ժամանած տասնյակ բեռնատարներն այժմ համալրել են այն 22 բեռնատարների շարքը, որոնք ամսից ավել կանգնած են Կոռնիձորում և չեն կարողանում մուտք գործել Արցախ։

Մի կողմից հասկանալի է հանրության սպասումները, որ Ադրբեջանը չէր համարձակվի փակել Հակարիի կամուրջը ֆրանսիական բեռնատարների առջև, մյուս կողմից հասկանալի է նաև այն դժգոհությունն ու հիասթափությունը, որ կա նման իրողության կապակցությամբ։ Իհարկե Ֆրանսիան հրաշալի գիտակցում և հասկանում էր, թե ինչ հետևանքներ կարող է լինել և հնարավոր է, որ Ադրբեջանը թույլ չտա ֆրանսիական բեռնատարների մուտքն Արցախ, և ուրեմն ինչու՞ պաշտոնական Փարիզը գնաց նման քայլի։ Ըստ էության, այս կերպ առնվազն բացահայտվեց ադրբեջանական կողմի հայտարարություների կեղծ հանգամանքը։ Նախօրեին Ֆրանսիայի նախագահ Էմանուել Մակրոնի հետ հեռախոսազրույցում Իլհամ Ալիևը հայտարարել էր, թե հայերը դեմ են Աղդամի ճանապարհը բացելուն, որպեսզի հումանիտար օգնություն հասցվի։ Ադրբեջանի նախագահի խորհրդական Հիքմեթ Հաջիևն էլ երեկ նշել է, որ եթե Աղդամ-Ստեփանակերտ ճանապարհը բացվի, ապա 24 ժամվա ընթացքում կբացվի նաև Լաչինի ճանապարհը։ Փաստացի այս հայտարարություններով Ադրբեջանը կամա թե ակամա ընդունում է, որ իրենք են շրջափակման ենթարկում Արցախը և, որ այնտեղ հումանիտար ճգնաժամ կա։

ՄԱԿ անվտանգության խորհրդում Ադրբեջանի ներկայացուցիչ Յաշար Ալիևը ցուցադրում էր լուսանկարներ Արցախում տարբեր հարսանեկան արարողություններց և առատ սեղաններից, իսկ հաշված օրեր անց, Ադրբեջանն ալյուր և հացամթերք է ուղարկում Աղդամի ճանապարհով։ Այս փաստը ևս հակասության մեջ է մտնում այդ երկրի պաշտոնական հայտարարությունների հետ, և տրամաբանական հարց է ծագում միջազգային հանրության մոտ, որ Իլհամ Ալիևն ու նրա վարչակազմը պարզապես ստում են։ Ինչ քայլեր կհետևի Ֆրանսիայի այս քաղաքական ժեստին, առայժմ վաղ է ասել, բայց այն, որ Փարիզը լուրջ պատրաստվել էր նման քայլ անելուն կասկած չի հարուցում, ուստի և առաջիկայում բավական ուշագրավ զարգացումներ են սպասվում։

Նարինե Թոմոյան