Երևանի ավագանու ընտրությունները մեկ էական ցուցիչ են
ՎԵՐԼՈՒԾՈՒԹՅՈՒՆՆԵՐ
Երևանի ավագանու ընտրությունները մեկ էական ցուցիչ են։ Բոլոր այն քաղաքական ուժերը որոնք ընտրություններին մասնակցում են բացառապես Երևանի քաղաքային խնդիրները չարաշահելով, այլ ոչ քաղաքականացնելով ընտրությունները և այն կապելով Արցախի հետ, պարզապես թելում են գործող իշխանությունների թելը։
Փաստացի, նախօրեին քարոզարշավի ժամանակ, երբ լրագրողներից մեկը քաղաքապետի ՔՊ-ական թեկնածու Տիգրան Ավինյանին հարցրել էր Արցախի մասին, վերջինս պարզապես հորդորել էր իրեն հարցեր տալ Երևանից։ Սա ընդամենը բնորոշում է ավագանու ընտրությունների վերաբերյալ գործող իշխանությունների մոտեցումները, նրանք ամեն գնով ցանկանում են կարևորագույն քաղաքական ընտրություններից մեկն ապաքաղաքականացնել և հանգեցնել միայն բացառապես Երևանի խնդիրներին վերաբերող ընտրության։
Այս հարցում, փաստացի գործող իշխանությունների դիրքերը փոքր–ինչ ավելի լավ են, քանի որ, ի տարբերություն իրենց ընդդիմախոսների իրենք են կառավարում քաղաքը և ավելի լավ են տեղյակ քաղաքի խնդիրներից, բացի այդ գումարն էլ հենց գործող իշխանությունների մոտ է։ Մնացած բոլոր ուժերը, որոնք փորձում են զերծ մնալ Արցախում ստեղծված իրավիճակի մասին գնահատականներ հայտնելուց, ըստ էության մասնակցում են ընդամենը Քաղպայմանագրի հաղթանակն ապահովելու նկատառումներով։
Հատուկենտ քաղաքական ուժեր են 14 մասնակիցներից, որոնք իրենց առջև խնդիր են դրել բացահայտել ոչ միայն Երևանի, այլ նաև ամբողջ հանրապետության և Արցախի խնդիրները, արձանագրում են, որ այս ընտրութունները հնարավորություն են Նիկոլ Փաշինյանի վարչախմբից ազատվելու և Երևանի ավագանու ընտրություններից հետո լայն իշխանափոխություն իրականացնելու։ Այդ ուժերից մեկն էլ «Ապրելու երկիր» կուսակցությունն է։ Ըստ էության, մոտեցումների այս տարբերութունը վկայում է երկու հակադիր հոսանքների մասին։
Երևանի ավագանու ընտրությունները, իհարկե, քաղաքային ընտրություններ են, և ավագանի անցնող և Երևանի քաղաքապետի պաշտոնը ստանձնող թիմն առաջին հերթին զբաղվելու է Երևան քաղաքի խնդիրներով, սակայն Երևանի ավագանու ընտրությունները նաև քաղաքական ընտրություններ են, ինչը նշանակում է, որ Երևանն է որոշելու հանրապետության հետագա քաղաքական ճակատագիրը, ուստի և պետք է ամեն ինչ անել Երևանի ավագանու ընտրություններում Քաղպայմանագրի պարտությունն իրականություն դարձնելու համար։
Անի Մանթաշյան
