Ռուս խաղաղապահներն Արցախում քննադատության են արժանանում

Արցախում երեք երիտասարդների առևանգումը ռուս խաղաղապահների աչքի առջև, հերթական անգամ սրել է խոսակցություններն Արցախում ռուսական ներկայության և աշխատանքի արդյունավետության վերաբերյալ։ Տևական ժամանակ ռուս խաղաղապահները պարզապես չեն կատարում եռակողմ հայտարարությամբ իրենց ստանձնած պարտավորությունները և չեն ապահովում ինչպես Լաչինի միջանցքով անցումը, այնպես էլ արցախցիների անվտանգությունը։ Երեկ ևս առևանգումից հետո բողոքի ակցիա է տեղի ունեցել Արցախի հրապարակում, և հիմնական պահանջները ոչ միայն Հայաստանի իշխանություններից են, որոնք բացարձակապես չեն խառնվում Արցախում ստեղծված իրավիճակին և չեն փորձում ապահովել 120 հազար արցախցիների անվտանգությունը, այլ նաև ռուս խաղաղապահներից։

Արցախի ԱԱԾ նախկին ղեկավար Արշավիր Ղարամյանը նշել է, թե Արցախում տեղակայված ռուսական խաղաղապահ զորախմբի հրամանատար, գեներալ Լենցովն իր գործունեությամբ կամ անգործությամբ, հնարավոր է դիտավորությամբ, չի զիջում ԼՂԻՄ առաջին պարետ, հայատյաց տխրահռչակ գեներալ Սաֆոնովին։ Լենցովն, ի դեպ, արդեն իսկ ըստ մամուլի, հրաժարական է տվել իր պաշտոնից և վերադարձել է Ռուսաստան։ Առաջիկա օրերին Արցախում խաղաղապահների նոր հրամանատար է նշանակվելու՝ 2020 թվականի նոյեմբերի 9-ից հետո թվով 5-րդ հրամանատարը։ Այդ պաշտոնն արդեն իսկ զբաղեցրել են գեներալներ Ռուստամ Մուրատովը, Անաշկինը, Անդրեյ Վոլկովը և Ալեքսեյ Լենցովը։ Թերևս միայն Ռուստամ Մուրատովի օրոք մի շարք դրական տեղաշարժեր եղան, Մուրատովն անձամբ կարողացավ հասնել մի քանի տասնյակ ռազմնագերիների ազատ արձակմանը, մյուս պարագայում խաղաղապահներն առանձնապես խանդավառված չէին իրենց պարտականությունները կատարելով։ Թերևս այս հանգամանքը լուրջ վտանգում է Արցախում ռուսական ներկայությունը և արցախցիների շրջանում Ռուսաստանի նկատմամբ ատելություն բորբոքում։

Աննա Մելիքյան