Ադրբեջանը թելադրում է, ՀՀ իշխանությունը լուռ գլխով անում. ի՞նչ անել
ՔԱՂԱՔԱԿԱՆՈՒԹՅՈՒՆ
Նիկոլ Փաշինյանն այսօր Կառավարության նիստում հայտարարեց. «Հավաստի տեղեկություններ են հասել, թե ծրագրեր են մշակվում Լաչինի միջանցքը միակողմանիորեն բացելու, այսինքն՝ ԼՂ-ից ելք թույլ տալու և մուտք թույլ չտալու մասին»: Ի՞նչ է նշանակում այս հայտարարությունը բացի նրանից, որ Արցախի հայաթափման գործընթացը արագացվում է:
ԱԺ «Պատիվ ունեմ» խմբակցության քարտուղար Տիգրան Աբրահամյանը հիշեցրեց, որ այս մասին Ադրբեջանի նախագահը բազմիցս հայտարարել է, նշելով, որ Արցախում ապրող մարդիկ ունեն երկու ընտրություն. կա՛մ պետք է մնան որպես Ադրբեջանի քաղաքացիներ, կա՛մ պետք է դուրս գան: Այլ կերպ ասաց, եթե Ադրբեջանը հիմա փորձում է միակողմանի ճանապարհը բացել այն մարդկանց համար, ովքեր ուզում են դուրս գալ, դրա մասին արդեն իսկ հայտարարվել է:
«Հայաստանի իշխանությունների խնդիրը ոչ թե անընդհատ այս մասին հանրությանը հաղորդելն է, քանի որ սրա մասին բոլորն արդեն գիտեն, այլ նախ պետք է ասեն, թե ինչ են արել այս տարիների ընթացքում, որպեսզի կանխեն նման իրավիճակի ստեղծումը՝ բլոկադա, ռեսուրսների ոչ բավարար քանակի ամբարում Արցախում և այս իրավիճակում որն է լինելու իրենց անելիքը: Նիկոլ Փաշինյանին երևի թվում է, թե ինքը շարունակում է լինել «Հայկական ժամանակի» գլխավոր խմբագիրը և միայն լուրեր է այստեղից-այնտեղից հայթայթում ու հրապարակում»,- ասաց ընդդիմադիր պատգամավորը:
Բացի այս, շարունակեց Աբրահամյանը, Հայաստանի այն իշխանությունը, որը հայտարարում է, որ պատրաստ է ճանաչել Արցախը Ադրբեջանի կազմում, բնականաբար գիտակցում է և գիտակցված է այս իրավիճակին մոտենում, որովհետև սա բխում է նաև իր պաշտոնական դիրքորոշումից և հենց Հայաստանի այս դիրքորոշումն է, որն արագացնում է Արցախի ադրբեջանացումը:
Դիտարկմանը, թե արցախցիները լրջագույն խնդիր ունեն երկիրը լքելու գործընթացի հետ կապված, քանի որ տղամարդկանց ելքը Արցախից խիստ հարցականի տակ է՝ Ադրբեջանը նրանց ցանկացած շինծու մեղադրանքով կարող է ձերբակալել և վերջին դեպքերը դրա վառ վկայությունն են, ինչպես պետք է այս հարցը լուծվի, Տիգրան Աբրահամյանն արձագանքեց.
«Ադրբեջանը թելադրում է խաղի իր կանոնները, Հայաստանի իշխանությունները լուռ համաձայնվողի դերում են, և այս պայմաններում Ադրբեջանի համար հետաքրքիր էլ չի՝ ինչպես կուզի, այնպես էլ կշարժվի: Եվ այս ծանր իրավիճակում, երբ Հայաստանի իշխանությունը ոչ միայն գլխով անողի, այլև, ըստ էության, Ադրբեջանին օժանդակողի դերում է, ամբողջ ասելիքն ու անելիքը փաստացի մնում են Արցախի ու արցախցիների վրա»,-հավելեց մեր զրուցակիցը:
