ԱԽ նիստից հետո քննարկվո՞ւմ է Աղդամով օգնություն ստանալու հարցը. նախագահի խորհրդականի պարզաբանումը
ՔԱՂԱՔԱԿԱՆՈՒԹՅՈՒՆ
Արցախի իշխանություններն այս պահին քննարկում են երեկ ՄԱԿ ԱԽ նիստի ժամանակ Արցախի վերաբերյալ հնչեցված մոտեցումները․ MediaHub-ի հետ զրույցում այս մասին ասաց Արցախի նախագահ Արայիկ Հարությունյանի խորհրդական Վլադիմիր Գրիգորյանը։
Թեպետ ՄԱԿ-ի Անվտանգության խորհրդի անդամների մեծամասնությունը համակարծիք էր Լաչինի միջանցքն անհապաղ բացելու հարցում, այդուհանդերձ հնչեցին կարծիքներ նաեւ Աղդամով արցախահայությանը հումանիտար օգնություն տրամարդելու վերաբերյալ։ Լաչինի միջանցքը փակելուց ամիսներ անց Ադրբեջանը, որպես բարի կամքի դրսեւորում եւ որպես Լաչինի միջանցքի այլընտրանք առաջարկեց բլոկադայի մեջ հայտնված արցախահայությանը սնունդ հասցնել ադրբեջանական վերահսկողության տակ հայտնված Աղդամի ճանապարհով։ Առայժմ հստակ չէ, թե Արցախի իշխանությունները, այնուամենայնիվ, ինչ որոշում կկայացնեն Աղդամով հումանիտար օգնություն ստանալու վերաբերյալ։
Ինչպես մեզ հետ զրույցում ասաց Վլադիմիր Գրիգորյանը՝ այս պահին քննարկումներ է ընթանում, որեւէ հստակություն դեռ չկա։
«Աղդամով հումանիտար օգնություն ստանալու վերաբերյալ նախորդ փակ քննարկումների ժամանակ հայտարարվել է, որ այդ տարբերակը չի քննարկվում։ Ինչ վերաբերում է երեկվա Անվտանգության խորհրդի նիստի արդյունքներին՝ այս պահին քննարկումներ են տեղի ունենում, որպեսզի տրվի համապատասխան արձագանք»,-ասաց նա։
Ըստ Գրիգորյանի՝ միջազգային հանրությունը բավարար ջանքեր չի գործադրում, որպեսզի կանխվի արցախահայության կյանքին սպառնացող հումանիտար աղետը։
«Մենք դեռ հուսով ենք, որ վերաբերմունքի առնչությամբ որոշակի փոփոխություններ կլինեն, այս փուլում դեռ չենք ցանկանում գնահատականներ տալ: Գործընթացներ են ընթանում, սպասենք իրադարձությունների զարգացմանը»,-ասաց նա։
Լիա Սարգսյան
