14 ուժ կպայքարի ավագանու համար. ո՞վ կարող է մարտահրավեր նետել «Քաղպայմանագրին»

Երեկ երեկոյան 18։00-ին ավարտվեց վերջնաժամկետը, երբ քաղաքական ուժերը կարող էին հայտ ներկայացնել Երևանի ավագանու ընտրություններին մասնակցելու։ ԿԸՀ տվյալներով՝ Երևանի ավագանու ընտրություններին մասնակցելու համար առաջադրվել է 13 կուսակցություն և կուսակցությունների 1 դաշինք։

Առաջադրված քաղաքական ուժերին պայմանական կարելի է բաժանել 4 մասի։ Դրանցից առաջինը հենց գործող իշխանությունն է՝ «Քաղաքացիական պայմանագիրը, որն ընտրություններին մասնակցելու է այս անգամ վարչական ռեսուրսների ամբողջական կիրառմամբ, կրիմինալին, տեղական օլիգարխներին ներգրավվելով և բոլոր միջոցներով փորձելով ապահովել իր վերարտադրությունը, ընդ որում բոլոր նախկին տեղական օլիգարխները, որոնք առաջ աջակցում էին նախկին իշխանությունների ներկայացուցիչներին, այս անգամ իրենց ջանքերն օգտագործելու են «Քաղաքացիական պայմանագիր» կուսակցությանն աջակցելու համար։

Միակը, որը Երևանում է և հրաժարվել է աջակցել «Քաղաքացիական պայմանագրին» հենց ՔՊ խմբակցության պատգամավոր Խաչատուր Սուքիասյանն է, որն անձամբ Նիկոլ Փաշինյանին ասել է, որ որևէ կերպ Տիգրան Ավինյանի համար ձայներ չի բերելու։

Երկրորդ խմբում պայմանական կարող ենք ընդգրկել իշխանության խամաճիկներին, սպասարկուներին և ծաղրածուներին, որոնց հիմնական նպատակն ընդդիմադիր իրական ուժերի ձայները փոշիացնելն է։ Այս ցանկում էլ կարելի է ներառել «Հայաստանի եվրոպական», «Ուժը հայրենյանց», «ՀԱՍԱԿ», «Հաղթանակ» , «Հանրապետություն», «Միացյալ Հայաստան» և «Լուսավոր Հայաստան» կուսակցություններին, որոնք իրականում ընտրություններին մասնակցում են ընդդիմությունից ձայն փախցնելու, իսկ ավագանու կազմում հայտնվելու դեպքում, գործող իշխանությունների հետ գործարքի գնալու համար։

Երրորդ խմբում այն քաղաքական ուժերն են, որոնք խնդիր են դրել իրենց առաջ ճանաչելիություն ձեռք բերել և նույնիսկ ցածր տոկոսների դեպքում իրենց համար խնդիր չէ, ուղղակի մասնակցում են, որպեսզի հանրությունը ճանաչի, առաջիկայում խորհրդարանական ընտրություններին հայտ ներկայացնելու։ Այստեղ էլ կարող ենք առանձնացնել «Ժողովրդավարական համախմբում», «Արդար Հայաստան» կուսակցություններին։ Եվ չորրորրդ խումբն այն քաղաքական ուժերն են, որոնք, կա՛մ իրական ընդդիմադիր են, կա՛մ էլ կարող են լուրջ մարտահրավեր նետել «Քաղաքացիական պայմանագրին»։

Այս խմբում էլ երեք կուսակցություններ են՝ «Ազգային առաջընթացը», որի ցուցակը գլխավորում է նախկին քաղաքապետ Հայկ Մարությանը, «Մայր Հայաստան» դաշինքը՝ Անդրանիկ Թևանյանի գլխավորությամբ, և «Քաղաքացիական պայմանագրի» իրական մարտահրավեր նետելու հնարավորություններ ունեցող «Ապրելու երկիր» կուսակցութունը։

Նարինե Աբրահամյան