Եվրոպան ամրապնդում է իր դիրքերը Երևանում

Եվրոպական առաջատար երկրները և Եվրամիությունն առաջիկայում Հայաստանում հանդես են գալու նոր դեմքերով՝ անբավարար գնահատելով նախկին ներկայացուցիչների և դեսպանների աշխատանքը։ Փաստացի Եվրամիությունը, որը ցանկանում է ամրապնդվել Հայաստանում և իր ձեռքը վերցնել երկրի ամբողջական վերահսկողությունը, այդ թվում նաև ուժային կառույցները, ցանկանում է փոխել հիմնական դեսպաններին, շատերը չեն բավարարել Եվրամիության եվրոպական առաջատար երկրների պահանջմունքները և նրանց փոխարեն նոր դեսպաններ են նշանակելու։

Արդեն իսկ Հայաստանում իր աշխատանքն է սկսել Ֆրանսիայի դեսպան Օլիվիե Դըկոտինյին, որը մինչ այդ եղել է իրաքյան Քրդստանում Ֆրանսիայի գլխավոր հյուպատոսը։ Հատուկ Հայաստանում նշանակվելու համար բավական լուրջ ռազմական կրթություն ունեցող և տարածաշրջանի իրողություններին տիրապետող Օլիվիե Դըկոտինյին արտակարգ և լիազոր դեսպանի պաշտոն են տվել։

Մեր տեղեկություններով՝ առաջիկայում իր պաշտոնին հրաժարական կտա նաև Հայաստանում Գերմանիայի դեսպան Վիկտոր Ռիխտերը, վերջինս ևս առանձնապես ակտիվ չէ Հայաստանում և Գերմանիայում դժգոհ են նրա աշխատանքից։ Հիշեցնենք, որ ամիսներ առաջ էլ Հայաստանում նշանակվեց ԱՄՆ նոր դեսպան Քրիստինա Քվինը՝ փոխարինելով Լին Թրեյսին, որն այժմ Միացյալ Նահանգների դեսպանն է Ռուսաստանում։ Քրիսինա Քվինն էլ Կալիֆորնիա նահանգից է և բավականին լավ տիրապետում է հայկական իրողություններին։

Ամենակարևոր նշանակումը, որ տեղի է ունենալու առաջիկայում, դա Եվրամիության ներկայացուցչի նշանակումն է։ Անդրեա Վիկտորինը, որը թեև բավականին ակտիվ է եղել Հայաստանում Եվրամիության ստվերային և այլ կարիքներն առաջ մղելու հարցում, հեռանում է այդ պաշտոնից, իսկ նրա փոխարեն նշանակվելու է Վասիլիս Մարագոսը։ Վերջինս՝ հիմա ղեկավարում է եվրոպական հանձնաժողովի հարևանության ընդարձակման հարցերով գլխավոր վարչության Բոսնիա և Հերցեգովինայի ու Կոսովոյի խումբը, իսկ ավելի վաղ նա նույն վարչությունում ղեկավարել է Հայաստանի և Ադրբեջանի, Բելառուսի և Արևելյան գործընկերության խումբը։ Փաստացի շատ ավելի լավ է տիրապետում իրողություններին և նաև լուրջ շփումներ ունի Հայաստանում։

Արամ Բարսեղյան