Փաշինյանը մտադիր է փոփոխություններ անել կառավարությունում

Գործող վարչախումբը լուրջ մտադրություններ ունի Հայաստանի կառավարության կազմում վերադասավորումներ իրականացնելու։ Նիկոլ Փաշինյանը հասկացել է, որ առանձնապես մասնագիտական և որակական հատկանիշներ չունեցող կողմնակիցներով շատ հեռուն չի կարողանալու գնալ, մի մասին ընդհանրապես չի վստահում, շատերն էլ չեն կարողանում որևէ կերպ կատարել իրենց վրա դրված պարտականությունները և լուրջ վերահսկողական ֆունկցիաներ իրականացնել։

Մեր աղբյուրների փոխանցմամբ՝ Փաշինյանը մտադիր է նույնիսկ հիմա իրականացնել այդ փոփոխությունները, սակայն ՔՊ վարչությունում որոշել են սպասել Երևանի ավագանու ընտրություններին, Երևանի քաղաքապետի պաշտոնը ստանալուց հետո այլևս անցնեն նաև մարզերում և կառավարության կազմում փոփոխություններին։ Փաշինյանը դժգոհ է մի ամբողջ շարք նախարարներից, այդ թվում Բարձր տեխնոլոգիական արդյունաբերական նախարար Ռոբերտ Խաչատրյանից, որին հատկապես մեղադրում են ռազմաարդյունաբերության ոլորտում էական և շոշափելի լուրջ քայլեր չանելու մեջ, Էկոնոմիկայի նախարար Վահան Քերոբյանից, վերջինս վաղուց արդեն ծաղրի առարկա է դարձել նույնիսկ Քաղպայմանագրի շրջանակներում։

Փաշինյանը նաև լրջորեն մտածում է Շրջակա միջավայրի նախարար Հակոբ Սիմիդյանին և Տարածքային կառավարման և ենթակառուցվածքների նախարար Գնել Սանոսյանին փոխարինելու մասին։ Նրանք առանձնապես չեն կարողանում լուրջ վերահսկել իրենց իսկ նախարարությունները։ Թե ովքե՞ր են փոխարինելու այս նախարարներին, առայժմ որևէ տեղեկություն չկա, Փաշինյանը կողմնակիցներից գաղտնի է պահում հնարավոր թեկնածուների անունները։

Իրենց պաշտոններից հրաժարական կտան առնվազն 4-5 մարզպետներ։ Փաշինայնը խիստ դժգոհ է Արարատի մարզպետ՝ Սեդրակ Թևոնյանից, Գեղարքունիքի մարզպետ՝ Կարեն Սարգսյանից, Կոտայքի մարզպետ՝ Ահարոն Սահակյանից և Վայոց ձորի մարզպետ՝ Արարատ Գրիգորյանից։

Նաիրա Սաֆարյան