Ադրբեջանը հրաժարվում է թույլատրել բեռնատարների մուտքը

Մարդասիրական բեռով հայկական բեռնատարներն արդեն 2 օր է կանգնած են Հակարիի կամրջի մոտ։ Ադրբեջանը, չնայած աննախադեպ միջազգային ճնշմանը, որևէ կերպ թույլ չի տալիս 400 տոննա մարդասիրական բեռն անցկացնել Արցախ։ Ի սկզբանե ակնհայտ էր, որ Ադրբեջանը որևէ կերպ թույլ չի տալու օգնություն հասցնել Արցախի ժողովրդին։

Մոսկվայում եռակողմ հանդիպումից անմիջապես հետո աշխատանքային խմբի նիստ էր եղել, որտեղ էլ, ըստ ամենայնի, որոշում էր կայացվել իրականացնել այս գործողությունը։ Ասել, որ այն դրական է, չափազանց գերագնահատած կլինենք։ Միևնույն ժամանակ նույնիսկ փորձագետներն են նշում, որ այս գործողությունը կարելի էր անել ավելի վաղ և ավելի լուրջ արդյունքներ ստանալ։

Նախ՝ այդկերպ հնարավոր կլիներ ապահովել արտաքին հզոր ճնշումը և Ադրբեջանին պարտադրել սնունդ հասցնել Արցախի բնակիչներին։ Իսկ այսօր արդեն Ադրբեջանն ինքն է Հայաստանին մեղադրում սադրանք անելու մեջ և հայտարարում, թե կարող են մարդասիրական բեռներ տեղափոխելու համար օգտագործել Աղդամ-Ասկերան ճանապարհը։

Ադրբեջանը բավականին երկար է նախապատրաստվել այդ ճանապարհը հայկական կողմին պարտադրելու հարցում և ինչ-որ պահի նույնիսկ հաջողել էր, վկան՝ միջազգային հանրության տարբեր դերակատարների հայտարարություններն էին։ Երեկ եվրոպական դիվանագիտության ներկայացուցիչ Ժոզեֆ Բորելը ևս ընդգծել է այդ առումով բեռներ հասցնելու կարևորությունը, միաժամանակ նշել, թե Աղդամը չի կարող այլընտրանք լինել Լաչինին։ Առայժմ հայտնի չէ՝ թույլ կտա Ադրբեջանն անցկացնել բեռները դեպի Արցախ, թե՝ ոչ, նույնիսկ եթե դա թույլ տա, ըստ էության առանձնապես ոչինչ չի փոխվում, 400 տոննա բեռն ընդամենը մեկ-երկու օրվա սնունդ է Արցախի բնակիչների համար և ավելի շուտ քաղաքական ակցիա է, քան լուրջ, իրավիճակային։

Ի դեպ այս իրավիճակը Հայաստանի գործող իշխանություններն ու Արցախում նրանց սպասարկուներն օգտագործում են Ռուսաստանի դեմ նոր արշավ սկսելուն։ Արցախի նախագահին կից հակաճգնաժամային խորհրդի նախագահ Տիգրան Պետրոսյանը գրել է, թե կամ Ռուսաստանը պետք է կատարի իր պարտավորություններն ապահովելու Լաչինի միջանցքով անվտանգ տեղաշարժը, կամ հայտարարի, որ ի վիճակի չի կատարել իր պարտավորությունները և դիմի միջազգային հանրությանը, հակառակ դեպքում Ռուսաստանը կկորցնի ողջ Կովկասը։

Մերի Վարդանյան