Լավրովի հայտարարության մեջ մեզ համար խիստ վտանգավոր կետ կա. փորձագետ

Նիկոլ Փաշինյանի ասածն այն էր, որ եթե Ադրբեջանը հարձակվի Արցախի վրա, Հայաստանը որեւէ ձեւով չի միջամտելու, եւ նա նաեւ հարց է տալիս, թե Հայաստանն ի՞նչ պարտավորություններ ունի: Այս մասին NEWS.am-ի հետ զրույցում նշեց ռազմական փորձագետ Հայկ Նահապետյանը:

«Հիմա ես հակադարձեմ, 2020-ի նոյեմբերի 9-ի փաստաթղթում առնվազն 4 կետ կա, որոնք վերաբերում է Լեռնային Ղարաբաղին, եւ դրա տակ դրված է Նիկոլ Փաշինյանի ստորագրությունը: Հիմա Նիկոլ փաշինյանը պարտավորություններ ունի ԼՂ-ի հանդեպ: Իհարկե, ունի»,-ասաց նա:

Ռազմական փորձագետը նշեց, որ նախօրեին ՌԴ ԱԳ նախարար Սերգեյ Լավրովի հայտարարությունում մեզ համար խիստ վտանգավոր կետ կար. «Լավրովն ասում է՝ շատ բաներ Հայաստանի եւ Ադրբեջանի պայմանավորվածությամբ է, եւ ինքը ճիշտ է, որովհետեւ նոյեմբերի 9-ի փաստաթղթում երկու կողմ կա, Ռուսաստանը միջնորդ է»:

Անդրադառնալով Նիկոլ Փաշինյանի հայտարարությանը, թե Արցախի իշխանություններն առանց իր գիտության Լաչինի ճանապարհի երթուղին փոխել են, Հայկ Նահապետյանն ասաց. «Ինքը մոռանում է, որ երթուղու փոփոխության հետ կապված առաջինը ինքն է խոսել՝ նշելով Բերձորի, Աղավնոյի եւ Սուսի բնակչության տեղափոխման մասին: Եթե անգամ Արցախի իշխանություններն են Ադրբեջանը հետ պայմանավորվալ եւ երթուղին փոխվել է, ապա ինչո՞ւ է դրա մասին այսօր ասում: Պատճառն այն է, որ ինքը ստում է, որովհետեւ եթե այդպես լիներ, ինքը դա կասեր երթուղին փոխելու ժամանակ: Կասեր՝ Արցախի իշխանությունները սեպարատ պայմանավորվածության մեջ են մտել Ադրբեջանի հետ, չեն լսում մեզ, որ չպետք է դա անել:

Հիմա Փաշինյանը նոր քավության նոխազ է գտել՝ Արցախը: Պարզվում է, որ այն միջոցները, որ Հայաստանը տալիս է Արցախին, նրանք պետք է չվերցնեն: Ինքն ասաց՝ եթե Հայաստանի քաղաքականությունը ձեր սրտով չի, ինչո՞ւ եք այդ գումարները վերցնում: Բայց այդ գումարները իրենք հոր տնից չեն բերել, դա գոյացել է մեր հարկատուների հաշվին»: