Արեւմուտքի եւ Ռուսաստանի դիրքորոշումներում ներդաշնակեցման միտումներ են տեղի ունենում. Փաշինյան

Ռուսաստանի բանակցային ակտիվությունը որոշակիորեն նվազել է, բայց դա նվազել է ոչ թե այն պատճառով, որ նրանք չեն ուզում հարցի կարգավորում, այլ Ուկրաինայի իրադարձությունների հետ կապված այն էներգիան, որ կներդնեին այս հարցում, հիմա չեն ներդնի: Այս մասին, այսօր՝ հուլիսի 25-ին, մամուլի ասուլիսի ժամանակ նշեց ՀՀ վարչապետ Նիկոլ Փաշինյանը:

«Եթե հաշվենք, թե վերջին տարիներին որտեղ եմ ավելի շատ հանդիպումներ ունեցել կամ որ հարթակներում եմ բանակցել, միանշանակ արեւմտյան հարթակները կգերակշռեն: Բայց դա նրանից չէ, որ մենք ուզեցել ենք, որ Ռուսաստանը դուրս մղվի կամ Արեւմուտքը դուրս մղվի, օբյեկտիվ հանգամանքների պատճառով է այդպես ստացվել»,-ասաց նա:

Փաշինյանի խոսքով, Արեւմուտքի եւ Ռուսաստանի դիրքորոշումներում մեր ընթացիկ իրավիճակի հետ կապված, մենք տեսնում ենք, որ ներդաշնակեցման միտումներ են տեղի ունենում:

Հարցին՝ Հայաստանը քայլեր անո՞ւմ է, որ ԵԱՀԿ Մինսկի խմբի ձեւաչափը վերականգնվի, վարչապետը պատասխանեց. «Հայաստանը քայլեր անում է, որ բանակցությունները մաքսիմալ արդյունավետ առաջ ընթանան: Իրականում Մինսկի խմբի համանախագահությունը ոչ ոք չի լուծարել: 2022-ի փետրվարին համանախագահողներն ասել են, որ Ուկրաինայի իրադարձությունների հետ կապված համանախագահողների մի մասը հրաժարվել է շփվել մյուս մասի հետ, որը բովանդակային առումով  բացարձակ կապ չունի ոչ Հայաստանի, ոչ Ադրբեջանի, ոչ էլ Ղարաբաղի հետ: Հիմա մի X պահի կարող են որոշել, նորից շփվել իրար հետ: Հայաստանի ու Ադրբեջանի տիրույթից դուրս կարող են նաեւ այլ պրոցեսներ լինել»: