Ստեղծվել է «Արցախի անվտանգության և զարգացման հայաստանյան հարթակը». Հարթակի համադրող Թևան Պողոսյանն է
ՔԱՂԱՔԱԿԱՆՈՒԹՅՈՒՆ
Հասարակական, քաղաքական, փորձագիտական տարբեր շրջանակների մասնակցությամբ շուրջ մեկ ամիս տևած քննարկումների արդյունքում ձևավորվել է «Արցախի անվտանգության և զարգացման ճակատ» հանրային շարժման հայաստանյան հարթակը, ընդունվել է նաև հարթակի հռչակման մասին հայտարարությունը:
Օրերս կայացած հանդիպման ընթացքում մասնակիցները, մեծապես կարևորելով հարթակի ձևավորումը Արցախի համար այս դժվարին փուլում, նշել են, որ հարթակի նպատակն է՝
Արցախի Հանրապետության շուրջ միավորել տարբեր քաղաքական ուժերի, կազմակերպությունների, նախաձեռնությունների և անհատների, համադրել նրանց ջանքերը,
Արցախում ստեղծված իրավիճակի շուրջ ներգրավել Սփյուռքի ներուժը, միջազգային ասպարեզում իրականացնել իրավիճակի իրազեկման և տագնապի հնչեցման գործողություններ,
Ստեղծված գոյաբանական ճգնաժամի պայմաններում մշակել Արցախի անվտանգային և զարգացման համապարփակ ծրագիր /ճանապարհային քարտեզ/՝ առանցքում ունենալով Արցախի ժողովրդի ինքնորոշման իրավունքի իրացումը,
Աջակցել Արցախի զարգացման և անվտանգության ճակատի գործունեությանը,
Գեներացնել Հայաստանի, Արցախի և հայկական աշխարհի հետպատերազմյան վերականգնման գաղափարներ:
Շարժման հայաստանյան հարթակի ձևավորումը Ստեփանակերտից ողջունել են «Արցախի անվտանգության և զարգացման ճակատ» հանրային շարժման համակարգող Ռուբեն Վարդանյանը և Շարժման անդամները՝ այն կարևոր քայլ համարելով Արցախի շուրջ հայության միավորման, ուշադրությունը Արցախի վրա կենտրոնացնելու առումով:
Հարթակի համադրող Թևան Պողոսյանը նշել է, որ այս հարթակը բոլորին հնարավորություն է տալու համախմբվել Արցախի հարցի շուրջ՝ ընդգծելով, որ շարժումը բաց է նոր գաղափարների և նախաձեռնությունների համար:
Կառույցը բաց է մասնակցության համար բոլոր նրանց համար, ովքեր պատրաստ են միավորվել ՀԱՅԿԱԿԱՆ, ԱԶԱՏ և ԱՆՎՏԱՆԳ ԱՐՑԱԽ ունենալու գաղափարի շուրջ:
Հարթակին միանալու համար կարելի է դիմել [email protected] էլեկտրոնային հասցեին:
«ԱՐՑԱԽԻ ԱՆՎՏԱՆԳՈՒԹՅԱՆ ԵՎ ԶԱՐԳԱՑՄԱՆ ՀԱՅԱՍՏԱՆՅԱՆ ՀԱՐԹԱԿԻ»
ՀԱՅՏԱՐԱՐՈՒԹՅՈՒՆ
2023թ. մայիսին, Արցախի ճակատագրով մտահոգ կազմակերպությունների ներկայացուցիչներ և անհատներ, վեր կանգնելով կուսակցական և անձնական շահերից, Ստեփանակերտում ձևավորեցին «Արցախի անվտանգության և զարգացման ճակատ» հանրային շարժումը՝ նպատակ ունենալով դիմագրավել Արցախում ստեղծված գոյաբանական սպառնալիքները, կառավարման ու հումանիտար խորացող ճգնաժամերը, մշակել Արցախի անվտանգության ու զարգացման նոր ռազմավարություն։
Հայաստանի, Արցախի և Հայկական աշխարհի հետպատերազմյան վերականգնման գաղափարներ գեներացնելու, տարբեր քաղաքական ուժեր, կազմակերպություններ, նախաձեռնություններ և անհատներ միավորելու և նրանց ջանքերը համադրելու, ինչպես նաև «Արցախի զարգացման և անվտանգության ճակատի» գործունեությանն աջակցելու նպատակով՝ նախաձեռնող խումբը հայտարարում է հայաստանյան հարթակի ձևավորման մասին։
«Արցախի անվտանգության և զարգացման ճակատի հայաստանյան հարթակը» ՀԱՅԿԱԿԱՆ, ԱԶԱՏ և ԱՆՎՏԱՆԳ ԱՐՑԱԽԻ գաղափարի շուրջ ձևավորվող համախմբում է, որը միավորում է քաղաքական ուժերի, հասարակական կազմակերպությունների և անհատների:
Հարթակը, համախմբելով հայության տարբեր հատվածների, հանրային, քաղաքական, հոգևոր, մասնագիտական շրջանակների, ծառայելու է Արցախի Հանրապետությունը հայկական պահելու, նրա ամբողջականությունն ու սուբյեկտայնությունն ապահովելու գերխնդրին՝ համոզումով, որ արցախահայության ինքնորոշման իրավունքն այլընտրանք չունի:
2020թ. սանձազերծված ադրբեջանա-թուրքական ագրեսիայի հետևանքով ստեղծված անվտանգային սպառնալիքները, Ադրբեջանի շարունակական ռազմատենչ, ցեղասպանական վարքագիծը, Արցախի Հանրապետության լիակատար շրջափակումը, վատթարացող սոցիալ-տնտեսական և բարոյահոգեբանական բարդ իրավիճակը, ՀՀ իշխանությունների վարած անհամարժեք արտաքին և ներքին քաղաքականությունը պահանջում են համազգային ներուժի համախմբում՝ հանգուցալուծելու Հայաստանի և Արցախի առջև ծառացած գոյաբանական խնդիրները:
Մենք՝ նախաձեռնող խմբի անդամներս,
Կոչ ենք անում Հայաստանի և Սփյուռքի բոլոր անհատներին, կազմակերպություններին, միավորումներին և նրանց ներկայացուցիչներին, ովքեր կիսում են հայտարարված գաղափարները, գիտակցում են իրենց պատասխանատվությունը Հայոց պետականության և Հայրենիքի հանդեպ, ովքեր հանձնառու են իրենց կարողություններն ու ներուժը ուղղել ծառացած մարտահրավերների լուծմանը՝ միանալ հարթակի ձևավորմանը՝ հիմք ընդունելով Հայաստանի Հանրապետության Անկախության Հռչակագիրը, Հայաստանի Հանրապետության և Արցախի Հանրապետության Սահմանադրությունները:
ՀԱՐԹԱԿԻ ՆՊԱՏԱԿՆԵՐԸ
Արցախի Հանրապետության շուրջ միավորել տարբեր քաղաքական ուժերի, կազմակերպությունների, նախաձեռնությունների և անհատների, համադրել նրանց ջանքերը,
Արցախում ստեղծված իրավիճակի շուրջ ներգրավել Սփյուռքի ներուժը, միջազգային ասպարեզում իրականացնել իրավիճակի իրազեկման և տագնապի հնչեցման գործողություններ,
Ստեղծված գոյաբանական ճգնաժամի պայմաններում մշակել Արցախի անվտանգային և զարգացման համապարփակ ծրագիր /ճանապարհային քարտեզ/՝ առանցքում ունենալով Արցախի ժողովրդի ինքնորոշման իրավունքի իրացումը,
Աջակցել Արցախի զարգացման և անվտանգության ճակատի գործունեությանը,
Գեներացնել Հայաստանի, Արցախի և հայկական աշխարհի հետպատերազմյան վերականգնման գաղափարներ:
