Քաղաքացիները Երեւանում տարբեր փողոցներ են փակել՝ ի պաշտպանություն Արցախի

Մի խումբ քաղաքացիներ ի պաշտպանություն Արցախի, փակել են Երեւանի Խանջյան-Սայաթ Նովա փողոցների խաչմերուկը:

Նրանք իրենց մոտ կրում են ռուսալեզու և անգլալեզու գրառումներով պաստառներ՝ «Դադարեցնել Արցախի շրջափակումը», «Բացեք կյանքի ճանապարհը», «Մենք ոչ ենք ասում կեղծ հումանիզմին», «Մենք Արցախն ենք»:

«Ժողովուրդ, պետք է միանաք  մեզ ու մեր Արցախը պահենք, պաշտպանենք։ 120 հազար մարդ բլոկադային մեջ է սոված, ծարավ,  մարդիկ այստեղ չգիտեմ ինչով են զբաղված։ Խնդրում ենք ժողովրդին՝ միանալ մեզ, մեր Արցախը պահենք, մեր Արցախը պահելու համար պետք է պայքարենք։ Դա մեր հայկական հողն է»,-ասաց ակցիայի մասնակիցներից մեկը: 

Նրանք վանկարկում են՝ «Միացում», «Արցախ»: Նրանք քաղաքացիներին կոչ են անում դուրս գալ և միանալ իրենց։

Ոստիկանները բարձրախոսով հորդորում են բացել պողոտան:

Այնուհետեւ ակցիայի մասնակիցները երթով հասել են Աբովյան փողոց եւ փակել նաեւ Աբովյան փողոցը:

Հիշեցնենք, որ այսօր ավելի վաղ քաղաքացիենրը որոշ ժամանակով փակել էին նաեւ Բաղրամյան պողոտան: Նրանք հայտարարել են, որ սա իրազեկման ակցիա է, իրենք իրազեկում են վաղը Ազատության հրապարակում ժամը 20-ին կայանալիք հանրահավաքի մասին։