Գործող իշխանությունները վաղուց այլևս դուրս են եկել բռնապետության արահետ

62 կողմ և 1 դեմ ձայների հարաբերակցությամբ փակ, գաղտնի քվեարկությամբ «Քաղաքացիական պայմանագիր» խմբակցությունը «Պատիվ ունեմ» դաշինքից պատագմավոր Թագուհի Թովմասյանին զրկեց Մարդու իրավունքների պաշտպանության հանձնաժողովի նախագահի պաշտոնից։

Թագուհի Թովմասյանը վերջին ընդդիմադիր պատգամավորն էր, որ խորհրդարանական հանձնաժողով էր ղեկավարում։ Անցած տարի իշխանությունն ԱԺ փոխխոսնակի տնտեսական հանձնաժողովի նախագահի պաշտոններից հեռացրել էր Իշխան Սաղաթելյանին և Վահե Հակոբյանին։ Ընդդիմադիր «Հայաստան» և «Պատիվ ունեմ» խմբակցություններն երեկ հրաժարվել են մասնակցել քննարկմանը՝ նշելով, թե այս կերպ իշխանությունը փորձում է վերջնական բռնապետություն հաստատել, իսկ քննարկումը տևել է ընդամենը հաշված րոպեներ։

Հիմնական զեկուցող տխրահռչակ Հովիկ Աղազարյանը կարճ ելույթ է ունեցել, որից հետո նույնիսկ հարցեր չեն հնչել։ Արդյունքում Թագուհի Թովմասյանին զրկել են Մարդու իրավունքների պաշտպանության հանձնաժողովի նախագահի պաշտոնից։

Իշխանությունը փորձում է խուսանավել այս հարցում՝ հայտարարելով, թե Թովմասյանին պաշտոնազրկում են Ազգային ժողովի խորհրդի 46 նիստերից, 38-ին չմասնակցելու պատճառաբանությամբ, մինչդեռ փաստն այն է, որ իշխանությունն ամեն ինչ անում էր այս կերպ ընդդիմադիր պատգամավորին լուրջ կապերից ու հնարավորություններից զրկելու համար։

Թովմասյանը մեկ անգամ չէ, որ եվրոպացիների մոտ բարձրացրել է Հայաստանի իշխանությունների իրականացրած ապօրինությունները։ Գործող իշխանությունները վաղուց այլևս դուրս են եկել բռնապետության արահետ և այդ ճանապարհին որևէ բանի առջև կանգ չեն առնում։

Ի դեպ, եթե նախկին իշխանությունների օրոք նման որևէ դեպք լիներ, իրավապաշտպան կառույցները մեկը մյուսի ետևից հայտարարություններ կտարածեին, կդատապարտեին իշախնությունների վարքն, իսկ այս անգամ մեկ իրավապաշտպան՝ Դանիել Իոնիսյանն է հայտարարել, թե Թագուհի Թովմասյանին լիազորություններից զրկելը պետության զավթման քայլ է։ Հայտնի և անհայտ մյուս բոլոր իրավապաշտպանները, սորոսական կառույցները բերանները ջուր են առել և ընդհանրապես որևէ բառ չեն արտահայտվել փաշինյանական վարչախմբի հերթական ապօրինության կապակցությամբ։

Արման Բարսեղյան