Վերելակներն ու ՔՊ-ն. նախընտրական կիսատ խոստումներ

«Ապրելու երկիր» կուսակցության համահիմնադիր Մեսրոպ Առաքելյանը չափազանց ուշագրավ դիտարկում է արել։ Երևան քաղաքում այս տարվա սկզբի դրությամբ առկա փոխարինման ենթակա է 3200 վերելակ, որից այս տարի նախատեսվում է փոխարինել 500-ն, անցած տարի էլ փոխարինվել է 467-ը։

Իհարկե, պարտադիր և առաջնային պայման է վերելակների փոխարինումը, սակայն, ըստ Առաքելյանի, պարզվում է, որ մոտ 1000 վերելակի փոխարինումը, կամ դրա ծրագիրը բացառապես նախընտրական խոստում է, որովհետև Երևան քաղաքի 2024-2026 թվականների միջնաժամկետ ծախսերի ծրագրով հաջորդ 3 տարիներին նախատեսվում է փոխարինել տարեկան ընդամենը 100 վերելակ, այսինքն արդեն աշնանն՝ ընտրություններից հետո, եթե «Քաղաքացիական պայմանագիր» կուսակցությանը հաջողվի մնալ իշխանության ղեկին, բնավ էլ միջոցներ չեն հատկացնելու Երևանում վերելակներ փոխարինելուն։

Ըստ Մեսրոպ Առաքելյանի՝ 2700 վերելակ, եթե բաժանում ենք տարեկան 100 վերելակի, ապա ստացվում է 27 տարի, այսինքն, եթե տեսականորեն ՔՊ-ն մնա իշխանության, Երևանի բոլոր վերելակները կփոխարինվեն 2050 թվականին։

Ըստ էության, այս դրվագը բացահայտում է մի շատ կարևոր ճշմարտություն՝ Նիկոլ Փաշինյանի և նրա թիմակիցների համար առաջնայինն այս պահին Երևանի ավագանու ընտրություններում հաղթանակ տանելն է և դրա համար նրանք անխնա ծախսում են բյուջեի միջոցներն, ի դեպ, ոչ այնքան բարեխիղճ և պրոֆեսիոնալ։

Երևանի բնակիչները բողոքում են չափազանց վատ տարվող ասֆալտից և այլ աշխատանքներից, այսինքն նույնիսկ այս առումով «Քաղաքացիական պայմանագիրը» և փոխքաղաքապետի թիմը չունեն բավարար հմտություններ, որպեսզի անգամ պետական ծախսերը կարողանան վերլուծել և նորմալ վերահսկել, ինչն էլ վկայում է, որ «Քաղաքացիական պայմանագիրը», ըստ ամենայնի, կպարտվի Երևանի ավագանու ընտրություններում, և երևանցիները շատ ավելի շուտ հնարավորություն կունենան փոխարինել իրենց վերելակները։

Նարինե Հակոբյան