Փաշինյանի ուղերձը բացահայտում է նրա խորքային վախերը
ՎԵՐԼՈՒԾՈՒԹՅՈՒՆՆԵՐ
Սահմանադրության օրվան նվիրված Նիկոլ Փաշինյանի ուղերձը բացահայտում էր նրա խորքային վախերն ու իրական երկու խնդիրներն, որոնք մտահոգում են գործող վարչախմբին։ «Սահմանադրական իրականության ապահովման ոլորտում մեր ամենամեծ մարտահրավերները մնում են արտաքին անվտանգությունը և անառարկելիորեն վստահելի դատական համակարգը, վստահելի բոլորի համար, և՛ կառավարության և՛ ընդդիմության, և՛ հանրության»,- իր ուղերձում նշել է Նիկոլ Փաշինյանը։
Հայտարարելով, թե դատաիրավական համակարգում ունեն էական առաջընթաց՝ այսօր որևէ անմեղ մարդ չի կարող մեղադրական վճռի արժանանալ, անհարկի ձերբակալվել կամ կալանավորվել, Փաշինյանն, իհարկե ստում է։ Միաժամանակ նա մեղադրանքի սլաքներ է ուղղում դատաիրավական համակարգի դեմ՝ նշելով, որ միշտ չէ, որ պատշաճ արագությամբ ու արդյունավետությամբ է այդ համակարգն արձագանքում իրավախախտումների դեպքերին։
«Հանրային և պետական նշանակություն ունեցող բազմաթիվ դատաքննություններ երբեմն օբյեկտիվ, երբեմն սուբյեկտիվ պատճառներով տարիներով շարունակվում են՝ առաջացնելով արդարացի հանրային տարակուսանք, քաղաքացիական և վարչական իրավահարաբերությունների ոլորտում նույնպես տարակուսելի իրադարձությունների ականատեսն ենք դառնում»,- հայտարարել էր Փաշինյանը և հավելել, թե դատաիրավական համակարգի բարեփոխումների իրենց վճռականությունն որևէ կերպ սասանված չէ։
Ըստ էության, սա նախազգուշացում է դատական համակարգին, որ Փաշինյանը մտադիր է մինչև վերջ լուծել նրա հարցերն, ազատվել անկախ դատավորներից և դատական համակարգն ամբողջական կախման մեջ դնել գործադիր իշխանությունից։
Վերջին շրջանում իշխանությունների թիվ մեկ մտահոգությունը դարձել է ոչ թե Հայաստանի և Արցախի անվտանգային միջավայրն, Ադրբեջանի կողմից պարբերաբար հնչող նոր պատերազմի սպառնալիքներն, այլ հենց դատական համակարգը վերջնականապես հողին հավասարեցնելու ցանկությունը։ Փաշինյանը գիտակցում է, որ իրեն դիմադրության վերջին օջախը մնացել են դատարանները, դատախազությունն, ոստիկանությունը, քննչական մարմինները վաղուց արդեն դարձել են գործող իշխանությունների կցորդը և կամակատարը և միայն հատուկենտ դատավորներ կարողանում են դիմադրել Նիկոլ Փաշինյանին։
Օրերս 5 դատավորների ազատումով Փաշինյանը ևս մեկ քայլով մոտեցավ դատական համակարգի վերջնական ձևախեղման իր մտադրությանը։
Գրետա Ալեքսանյան
