«Քիմիկների զորամասի» գործով հաջորդ նիստին կհարցաքննվեն տուժողները. փաստաբանն առարկեց դատարանի որոշման դեմ

Հակակոռուպցիոն դատարանը՝ նախագահությամբ դատավոր Սուրեն Խաչատրյանի, այսօր՝ հունիսի 30-ին, «Քիմիկների զորամասի» գործով դատավարությանը որոշել է ավարտել գործով գրավոր ապացույցների հետազոտման փուլը եւ անցնել գործով տուժողների հարցաքննությանը:

Պաշտպանական կողմը դեմ արտահայտվեց, նշելով, որ պետք է դատարանը հետազոտի գործում առկա ամբողջ փաստաթղթերը:

Փաստաբան Վահան Հովհաննիսյանը նշեց, որ եթե դատարանը չբավարարի իրենց միջնորդությունը, ապա դա կհամարվի պաշտպանության իրավունքի կոպիտ խախտում:

«Ես ավելի ողջամիտ եմ համարում, որ հետազոտվեն քրեական գործում առկա բոլոր փաստաթղթերը՝ սկսած քրեական գործի հարուցման պահից մինչեւ նախաքննության ավարտման պահը»,- նշեց Հովհաննիսյանը:

Դատախազը արձագանքելով պաշտպանների միջնորդությանը, նշեց, որ մինչեւ դատաքննության փուլ մտնելը պետք է կողմը ներկայացներ նման միջնորդություն, սակայն այժմ ներկայացված է ապացույցների հետազոտման հաջորդականությունը: 

Վահան Հովհաննիսյանն էլ հակադարձեց դատախազին. «Ինձ համար տարօրինակ է գործընկերոջս դիրքորոշումը, քանի որ հիմա հրապարակային դատաքննություն է ընթանում: Կարծում եմ՝ եթե մեղադրանքը ամուր է, ապա մեղադրողը չպետք է հակադարձի, որր հետազոտվեն քրեական գործում առկա բոլոր փաստաթղթերը»:

Դատարանը լսելով կողմերին որոշեց, որ նախ կհարձաքննվեն գործով տուժողները, այնուհետեւ գործում առկա բոլոր գրավոր փաստաթղթերը կհետազոտվեն, եթե կողմերը որեւէ փաստաթղթի վերաբերյալ կցանկանան ուշադրություն հրավիրել, ապա այն ամբողջությամբ կհետազոտվի եւ կհրապարակվի:

Վահան Հովհաննիսյանը առարկեց դատարանի որոշման դեմ, նշելով, որ այն ոչ իրավաչափ է. «Դրանով մենք մեկ անգամ եւս ձգձգում ենք տեւական ժամանակ տեւող դատաքննությունը: Պաշտպանական կողմը հնարավորություն չի ունենալու տուժողների հարցաքննության ընթացքում տալ այնպիսի հարցեր, որոնք բխում են գործի այն նյութերից, որոնք դեռեւս չեն հետազոտվել»:

Դատարանը չընդունեց փաստաբանի առարկությունը եւ նիստը հետաձգեց:

Նշենք, որ ըստ մեղադրանքի՝ գեներալ Մակարյանը, որը Կովսականի մարտական հատուկ առաջադրանքի պատասխանատուն էր, տեղեկանալով, որ Արսեն Աբգարյանի խումբը շրջափակման մեջ է հայտնվել, օգնության չի շտապել, նահանջի հրաման է տվել, իսկ ինքը վերադարձել է Կապան։ Այս ամենի հետեւանքով Աբգարյանի «Քիմիկների զորամասի» 40 զինծառայողներից 5-ը գերեվարվել են, 12-ը՝ սպանվել, իսկ մնացած 23 զինծառայողներն ու ավտոբուսի վարորդը անհայտ կորած են։

Գեներալ Անդրանիկ Մակարյանին առաջադրված է անգործություն ցուցաբերելու մեղադրանք եւ նրան սպառնում է ազատազրկում՝ 7-13 տարի ժամկետով

Նշենք, որ ծնողները ԴՆԹ գենետիկ փորձաքննության պատասխաններ ունեն Առողջապահության նախարարությունից, որոնք նույնականացվել են Կովսականից դուրս բերված մասունքների հետ, սակայն արդյունքներին շատ ծնողներ չեն հավատում։