Արտակարգ դեպք Երևանում․ 17-ամյա տղան հիվանդանոց է տեղափոխվել

Երեւանում հունիսի 25-ին արտակարգ դեպք է տեղի ունեցել. ժամը 11։30-ի սահմաններում Հերացու անվան թիվ 1 համալսարանական հիվանդանոցից ահազանգ է ստացվել ՀՀ ՆԳՆ Ոստիկանության Արաբկիրի բաժին, և հայտնել են, որ «Ձախ դաստակի 2-րդ մատի վնասվածք, տոտալ անդամահատում, հրազենային վնասվածք» ախտորոշմամբ իրենց մոտ բուժօգնության է տեղափոխվել մի քաղաքացի։

Shamshyan.com-ի հաղորդմամբ, բժիշկները ոստիկաններին հայտնել են, որ վիրավորը գտնվում է վիրահատարանում և ի վիճակի չէ կատարվածի մասին բացատրություն տալու։

Ոստիկանները պարզել են, որ վիրավորը Երևանի բնակիչ 17-ամյա Արման Ն․-ն է։

Նա վիրավորվել է նույն օրը, ժամը 11։00-ի սահմաններում իրենց տանը, ննջասենյակում իրեն պատկանող «Սուր-2608» տիպի  օդամղիչ ատրճանակով անփույթ վարվելու և կրակոց արձակելու հետևանքով:

Դեպքի վայրի զննությամբ հայտնաբերվել են 49 հատ օդամղիչ ատրճանակի համար նախատեսված գնդակներ և 1 հատ նշված ատրճանակի համար նախատեսված գնդակի կրակված պարկուճ, նշված ատրճանակը, ատրճանակի պլաստմասե տուփը  և զենքի հաշվառման թույլտվության քարտը:

Դեպքի փաստով Ոստիկանության Արաբկիրի բաժնում պատրաստվել են նյութեր և դրանք փոխանցվել  են Հայաստանի քննչական կոմիտեի Երևան քաղաքի քննչական վարչության Արաբկիրի քննչական բաժին, որտեղ դեպքի փաստով նախաձեռնվել է վարույթ։

Քննիչի որոշմամբ՝ նշանակվել են մի շարք փորձաքննություններ։