Փաշինյանի «մեղքն ուրիշների վրա բարդելու» փաստարկներին արձագանքել է Քոչարյանը
ՎԵՐԼՈՒԾՈՒԹՅՈՒՆՆԵՐ
Eadaily.com-ը գրում է, որ ՀՀ երկրորդ նախագահ Ռոբերտ Քոչարյանի գրասենյակն արձագանքել է վարչապետ Նիկոլ Փաշինյանի ղարաբաղյան հիմնախնդրի կարգավորման բանակցային գործընթացի վերաբերյալ իր նախորդներին, այդ թվում անձամբ Քոչարյանին ուղղված մեղադրանքներին։
Ելույթ ունենալով 2020 թվականի աշնանը 44-օրյա պատերազմի հանգամանքները հետաքննող հանձնաժողովի նիստում, կառավարության ղեկավարը, մասնավորապես, հայտարարել է, որ Հայաստանի նախկին ղեկավարները բանակցությունները տարել են փակուղի, տապալել Լեռնային Ղարաբաղի հարցը։ Ղարաբաղը հանվել է խաղաղության գործընթացից և համաձայնություն է ձեռք բերվել բանակցել Ադրբեջանի տարածքային ամբողջականության տրամաբանությամբ, Ադրբեջանին հնարավորություն է տրվել ավելի լավ պատրաստվել պատերազմի:
Մեղադրանքների մի մասն ուղղված են եղել հանրապետության երկրորդ նախագահին, ինչն, ըստ Փաշինյանի, վերաբերում էր Ստեփանակերտին բանակցային գործընթացից դուրս մղելուն։
Նախկին նախագահի գրասենյակը նշել է, որ Նիկոլ Փաշինյանը, «հնարավոր է, հասկանալով, թե ուր է առաջնորդել Հայաստանն ու Ղարաբաղը, փորձում է բոլոր հնարավոր և անհնար ձևերով մեղքը բարդել ուրիշների վրա»։ Նրանք հիշեցրել են, որ Լեռնային Ղարաբաղի ներկայացուցիչները դադարել են մասնակցել ԵԱՀԿ Մինսկի խմբի համանախագահների (Ռուսաստան, Ֆրանսիա և ԱՄՆ) հովանու ներքո անցկացվող բանակցություններին 1997 թվականին, այսինքն մինչ Ռոբերտ Քոչարյանի Հայաստանի նախագահ դառնալը։ Այսպիսով, նույն թվականի ապրիլին միջազգային միջնորդները հայտարարել են «մաքոքային դիվանագիտություն» մասին և հրաժարվել հակամարտող կողմերի մասնակցությամբ ձևաչափից այն համարելով անարդյունավետ։ Այդ ժամանակ արդեն (Լևոն Տեր-Պետրոսյանի նախագահության օրոք) ուղիղ բանակցություններ են ընթացել Հայաստանի և Ադրբեջանի ղեկավարների խորհրդականներ Ժիրայր Լիպարիտյանի և Վաֆա Գուլուզադեի միջև մեկուկես տարի։
Նախկին նախագահի մամուլի ծառայության մեկնաբանության մեջ նշվում է նաև, որ մինչև 2018 թվականն ԵԱՀԿ Մինսկի խմբի համանախագահները գրեթե բոլոր տարածաշրջանային այցերի ժամանակ եղել են նաև Լեռնային Ղարաբաղում, իսկ 2018 թվականից հետո, այսինքն Փաշինյանի իշխանության գալուց հետո, նրանք դադարել են այնտեղ այցելել։
Այնուհետև, ի պատասխան այն մեղադրանքի, որ Ռոբերտ Քոչարյանն իբր համաձայնվել է «ընդհանուր պետության» գաղափարի իրականացմանն, ինչպես պարզաբանել են նախկին նախագահի աշխատակազմում, դա եղել է ռուսական տարբերակի առաջարկ, որն առաջինն առաջարկվել է Ադրբեջանին. և կտրուկ մերժվել նրա կողմից։ Այսպիսով, հայկական կողմը նույնիսկ հնարավորություն չի ունեցել մասնակցել նման քննարկումների։
Խոսելով փոխանակման «Մեղրիի տարբերակի» մասին Քոչարյանի գրասենյակից նշել են, որ իրականում առաջարկի հեղինակն եղել է Ադրբեջանի նախկին նախագահ Հեյդար Ալիևը, և այն երբեք չի քննարկվել եռանախագահների «եռյակի» ձևաչափով, քանի որ այդ առաջարկը մերժվել է հայկական կողմից։
2001 թվականին ամերիկյան Քի Ուեսթում քննարկված փաստաթղթի համաձայն Լեռնային Ղարաբաղը Լաչինի միջանցքով պետք է միանար Հայաստանին, իսկ դրա դիմաց Ադրբեջանը Հայաստանի տարածքով ցամաքային կապ ստանար Նախիջևանի Ինքնավար Հանրապետության հետ, և ոչ թե միջանցք, այլ ճանապարհ, շեշտել են Քոչարյանի գրասենյակում։
Ամփոփելով հայտարարության հեղինակները նշել են, որ Քոչարյանի նախագահության օրոք «ոչ մի թիզ հող թշնամուն չի հանձնվել, իսկ այդ 10 տարին ամենախաղաղն ու հանգիստն է եղել երկրի անկախության նորագույն պատմության մեջ, Լեռնային Ղարաբաղն արագ զարգացում է ապրել, և Ադրբեջանի մտքով չի էլ անցել, որ ագրեսիա սանձազերծի Հայաստանի և Լեռնային Ղարաբաղի դեմ և մնա անպատիժ»:
Նյութը հրապարակման պատրաստեց Կամո Խաչիկյանը
