«Հայաստանի թշնամիներին քծնելու Փաշինյանի հերթական փորձը»
ՎԵՐԼՈՒԾՈՒԹՅՈՒՆՆԵՐ
Dzen.ru-ն գրում է, որ իրավիճակը Հայաստանում և Արցախում օրեցօր վատթարանում է վարչապետ Նիկոլ Փաշինյանի պարտվողական կեցվածքի, անկարողության ու Ադրբեջանին և Թուրքիային անվերջ զիջումների պատճառով։
Երբ նա եկավ իշխանության ներկայացավ որպես դեմոկրատ, բայց շուտով պարզվեց, որ նա բռնապետ է: Հինգ տարի առաջ Փաշինյանը մեծ հանրահավաքում խոստացավ. «Եթե Ղարաբաղի բանակցային գործընթացում լինի կարգավորման տարբերակ, որին ես ինքս համաձայնվեմ և լավ տարբերակ համարեմ, ոչ ոք թող չմտածի, որ ես կստորագրեմ որևէ թուղթ կամ կանեմ որևէ գործողություն ձեզնից թաքուն: Երբ տեսնեմ, որ կա մի տարբերակ, որի մասին իսկապես կարելի է խոսել, կգամ, կկանգնեմ այստեղ և կներկայացնեմ բոլոր մանրամասները, և դուք կորոշեք այդ տարբերակով գնալ կարգավորման, թե ոչ։ Եթե որոշեք, որ գնալու ենք, ուրեմն կգնանք, եթե որոշեք, որ չենք գնալու, ուրեմն չենք գնա։ Դուք բարձրագույն իշխանություն եք և դուք եք որոշում, և դրանում որևէ կասկած չի կարող լինել»։ Բայց 2018 թվականի այդ հանդիսավոր խոստումից հետո նա ոչ մի հարցով ժողովրդի որոշումը չի հարցրել։ Բայց արել է հետևյալը.
-Իր քաղաքական ընդդիմախոսների հասցեին սպառնալից հայտարարություններ է արել, տեղական ընտրությունների ժամանակ բանտարկել է իր կուսակցության մրցակիցներին, ձերբակալել ցուցարարներին և արգելել սփյուռքահայ նշանավոր անձանց մուտքը Հայաստան իր ռեժիմի նկատմամբ նրանց քննադատության պատճառով:
-Նա Հայաստանի բնակչությանը բաժանել է երկու թշնամական ճամբարների և օտարել սփյուռքին Հայաստանից։
-Բանակի կառավարումը սկզբունքորեն վատ է կազմակերպել 2020 թվականի աղետալի պատերազմի ժամանակ, որի արդյունքում զոհվել են հազարավոր հայ երիտասարդ զինվորներ, իսկ Արցախի մեծ մասը կորցվել է։
-Նա չի կարողացել հասնել Ադրբեջանից հայ ռազմագերիների ազատմանը։
-Վերջին երկու տարիների ընթացքում նա չի կարողացել պաշտպանել Հայաստանի սահմանները Ադրբեջանի կողմից կրկնվող հարձակումներից:
-Վեց ամիս նա չի կարողանում բացել Ադրբեջանի կողմից շրջափակված Լաչինի միջանցքը, ինչի հետևանքով Արցախի 120 հազար բնակիչ ունի սննդամթերքի ու դեղորայքի պակաս։
-Նա թուլացրել է հայոց բանակը։
- Նա մերժել է Արևմտյան Հայաստանի վերաբերյալ Թուրքիային ուղղված հայկական պահանջները հայտարարելով, որ Հայաստանը տարածքային պահանջ չունի իր հարևաններից որևէ մեկի նկատմամբ։
-Նա գնացել է Անկարա նախագահ Էրդողանի երդմնակալության արարողությանը խայտառակելով իրեն ու Հայաստանին։
-Նա Արցախը տվել է Ադրբեջանին: Հակառակ Փաշինյանի ստերին, ով ասում է, թե Արցախը տվել են Հայաստանի նախկին ղեկավարները, ԵՄ արտաքին հարաբերությունների և անվտանգության քաղաքականության գերագույն ներկայացուցիչ Ջոզեֆ Բորելը վերջերս ասել է, «Առաջին անգամ… Հայաստանում Ղարաբաղը համարել են Ադրբեջանի մաս»։
Եվ զարմանալի չէ, որ Ալիևն ու Էրդողանը գոհ են Փաշինյանից:
Վերջերս էլ Փաշինյանը խորհրդարանում ունեցած ելույթի ժամանակ կասկածելի հայտարարություններ է արել Հայաստանի պետական զինանշանի և օրհներգի վերաբերյալ, որոնք ամրագրված են Հայաստանի Սահմանադրությամբ։ Այսինքն օրհներգի ու զինանշանի վերաբերյալ Փաշինյանի քննադատությունը հակասահմանադրական է։
Ահա թե ինչպես է Փաշինյանը բնութագրել Հայաստանի զինանշանը. «Ի՞նչ է այնտեղ ցուցադրված: Նոյան տապանն Արարատ լեռան վրա, չորս գահերի զինանշաններ, տոհմեր... Ի՞նչ կապ ունեն դրանք 1991 թվականին հիմնադրված պետության հետ: Նայելով կենտրոնին՝ Արարատ լեռան վրա գտնվող Նոյան տապանին, Հայաստանի Հանրապետության այսօրվա տարածքը հեղեղված է: Առյուծ, որը երկար ժամանակ Հայաստանում բնական պայմաններում չի ապրում։ Խոսքը մեզնից յուրաքանչյուրի մեջ այդ երկակիության մասին է՝ պատմական Հայաստան և իրական Հայաստան... Իրական Հայաստա՞նը պետք է ծառայի պատմական Հայաստանին, թե՞ պատմական Հայաստանը պետք է ծառայի իրական Հայաստանին»։
Եզրափակելով իր խոսքը Փաշինյանն առիթը բաց չի թողել դժգոհելու Հայաստանի պետական խորհրդանիշներից մեկ այլից՝ պետական օրհներգից: Եվ դա հենց այն օրը, երբ Հայաստանը նշում էր Պետական խորհրդանիշների օրը։ Նա ասել է. «Այսօր մեր օրհներգի պաշտոնական խոսքերն ավարտվում են մահով։ Գաղափարախոսությունն ինքնին ճիշտ է, ուստի ես տեքստի հետ խնդիրներ չունեմ, բայց այն ավարտվում է մահվան տողով և մահվան տեսարանով»։
Սա Փաշինյանի հերթական փորձն է Հայաստանի թշնամիներին հանգստացնելու նպատակով թուլացնել հայերի ազգային զգացմունքները։ Հիշեցնենք, որ Օրհներգի խոսքերը գրել է նշանավոր բանաստեղծ Միքայել Նալբանդյանը 1861թվականին, այն Հայաստանի Առաջին Հանրապետության կողմից ընդունվել է 1918 թվականին և բառերի մի փոքր փոփոխությամբ վերահաստատվել է ներկայիս Հայաստանի Հանրապետության կողմից։
Ի՞նչ կառաջարկի Փաշինյանը հաջորդիվ: Երևի թե փոխել Հայաստանի դրոշն ու երկրի անունը: Սակայն սա այն նույն մարդն է, ով ինքնագոհ հայտարարում էր. «Ես չեմ պատկերացնում մի մարդու, ով կարող է ավելի շատ սիրել իմ երկիրը, քան ես: Չի կարող լինել նման բան, բացառվում է»։ Բայց անգամ խորհրդային տարիներին Խորհրդային Հայաստանի զինանշանի վրա էր պահպանվել Արարատ լեռը, որը Փաշինյանն առաջարկում է հանել։ Այդ դեպքում ինչպե՞ս կարող է անկախ Հայաստանի Հանրապետության վարչապետը լինել ավելի քիչ ազգայնասեր, քան անգամ Խորհրդային Հայաստանի ղեկավարները։
Նյութը հրապարակման պատրաստեց Կամո Խաչիկյանը
