Կարեն Անդրեասյանը կարող է հայտնվել ամբաստանյալի աթոռին

Բարձրագույն դատական խորհրդի նախագահ Կարեն Անդրեասյանը նախկինների օրոք զբաղեցնում էր մարդու իրավունքների պաշտպանի պաշտոնն, իսկ 2018թ. իշխանափոխությունից հետո իր սրտի խորքում վառ «հեղափոխականի» ավյուն հայտնաբերեց, Փաշինյանի նկարը փակցրեց գլխավերևում, զբաղեցրեց նախ արդարադատության նախարարի, ապա և ԲԴԽ նախագահի պաշտոնները։

Փաշինյանը ցանկանում էր Անդրեասյանի և անդրեասյանակերպերի միջոցով իր ձեռքը վերցնել դատական ողջ իշխանությունն, անհնազանդ դատավորներին հեռացնել համակարգից կամ պատժել, դատարաններին ստիպել հեղափոխական թիմի սրտին հաճո վճիռներ երկնել։ Անդրեասյանն, ըստ ամենայնի, լավ չի կարողացել գլուխ հանել իր վրա դրված զազրելի հանձնարարությունից, իսկ այս օրերին ԲԴԽ-ում դատավոր Դավիթ Հարությունյանի դեմ կարգապահական վարույթի քննությունը կարող է մնալ նրա կոկորդին։ Հարությունյանն, ի տարբերություն Անդրեասյանի և փաշինյանական հրահանգները կատարող այլ դատավորների, մեծ հեղինակություն է վայելում իրավաբանական համայնքում, ինքն էլ բավական կոշտ է արտահայտվում ԲԴԽ նախագահի հասցեին և իրավական ճակատամարտ է տալիս նրա դեմ։

Փաշինյանն, ըստ ամենայնի, խիստ դժգոհ է կատարվողից։ Երեկ մամուլում տեղեկություններ տարածվեցին, որ Ազգային անվտանգության ծառայությունում քրեական գործ է հարուցված ԲԴԽ նախագահ Կարեն Անդրեասյանի դեմ` լիազորությունների չարաշահման հոդվածով։ Գործը հարուցված է Վերաքննիչ քրեական դատարանում «ստվերային նախագահ» ընտրելու դեպքի առթիվ։ Կարեն Անդրեասյանն երեկ ոչ հերքել, ոչ հաստատել է այս տեղեկությունը, սակայն լրագրողների հետ զրույցում զգացվում էր ընկճվածությունը։

Կարեն Անդրեասյանը, լինելով ադարադատության նախարար Գրիգոր Մինասյանի մտերիմը, լուրջ թիրախավորվում է դրսից։ Կան թե ներքին խնդիրներ, թե՛ աշխարհաքաղաքական։ Անդրեասյանը հեռացնում է դատավորների, որոնք կապեր ունեն արտերկրում։ Իսկ ԲԴԽ նախագահը փորձում է քանդել այդ կապերն ու լծակները։

Նոնա Բաղդասարյան