Հրաձգություն Տեղում, Երասխում եւ Հաքարիի կամրջի մոտ. սա է վարչապետ Փաշինյանի «խաղաղության դարաշրջանը. Մամիջանյան

Հրաձգություն Տեղում, Երասխում եւ Հաքարիի կամրջի մոտ. սա է Հայաստանի վարչապետ Նիկոլ Փաշինյանի «խաղաղության դարաշրջանը։ Այս մասին Ազգային ժողովում, ավանդական ճեպազրույցների ժամանակ, հունիսի 16-ին ասել է Հայաստանի Հանրապետական կուսակցության անդամ, պատգամավոր Հայկ Մամիջանյանը։

Հայաստանի իշխանությունները, նրա խոսքով, հետեւողականորեն կատարում են ադրբեջանական կողմի ցանկացած պահանջ։

«Սակայն անգամ այդ դեպքում նրանք չեն կարող ապահովել խոստացված խաղաղության դարաշրջանը։ Դա տեղի է ունենում այն պատճառով, որ խաղաղությունը չեն մուրում։ «Ամեն ինչ կտանք» սկզբունքը խաղաղության չի հանգեցնում»,- ասել է Մամիջանյանը։

Ընդդիմադիր գործիչը նշել է, որ իշխանության իրականացրած խաղաղ գործընթացը, ըստ էության, հանգեցրել է շատ ավելի մեծ թվով մահերի, քան նախորդ երկու տարիների ընթացքում։

Պատգամավորը համոզված է. այսպես կոչված «խաղաղ գործընթացի» տակ իրականացվել է կործանարար գործընթաց՝ ուղղված Բաքվի բոլոր վերջնագրերի կատարմանը։ Ընդ որում՝ իշխանություններն այդ գործընթացը հակադրում են պատերազմին։

«Սակայն այդ գործընթացի այլընտրանքը պատերազմը չէ, այլ արժանապատիվ բանակցությունները, այն, ինչ կար մինչեւ իշխանափոխությունը Հայաստանում։ Այն տարիներին Հայաստանը բարձրացնում էր Արցախի ինքնորոշման հարցը»,- նշել է Մամիջանյանը։