Ադրբեջանական մտրակ, թուրքական բլիթ. Էրդողանը ծաղրում է Նիկոլ Փաշինյանին

Ադրբեջանը վերջին օրերին սաստկացրել է հրադադարի ռեժիմի խախտումները, իսկ նախօրեին և երեկ ընդհուպ ինտենսիվ գնդակոծության ենթարկել Հայաստանի ինքնիշխան տարածքը՝ Երասխի հատվածում կրակոցներ արձակելով կառուցվող մետալուրգիական գործարանի ուղղությամբ։ Կրակոցների հետևանքով վիրավորվել են Հնդկաստանի երկու քաղաքացիներ, որոնք աշխատում էին այդ գործարանում։ Նրանց բարեհաջող վիարհատել են։

Ադրբեջանական այս ագրեսիայի ֆոնին ուշագրավ են Թուրքիայի նախագահ Ռեջեփ Թայիփ Էրդողանի հայտարարությունները։ Ադրբեջանից վերադառնալիս՝ Էրդողանը հայտարարել է, թե Թուրքիան շահագրգռված է տարածաշրջանի և աշխարհում խաղաղության կայունության հաստատման հարցում։ Նշել, թե խաղաղության դռները տարածաշրջանում կիսաբաց են։ Էրդողանը բառացի ծաղրել է Նիկոլ Փաշինյանին, կարևոր քայլ որակել նրա այցը Անկարա։ «Դրական արձագանքելով թուրքական կողմի հրավերին՝ Փաշինյանը հաղթահարեց բազմաթիվ խոչընդոտներ և ընդդիմադիր տրամադրություններ իր երկրում: Ես առիթ ունեցա հակիրճ շփվելու նրա հետ արարողության ժամանակ, իմ երախտագիտությունը հայտնեցի Թուրքիա ժամանելու կապակցությամբ»,- ասել է Էրդողանը։

Նա նաև չափազանց կարևոր է որակել վարչապետի պաշտոնը զբաղեցնող անձի խոսքերը Ադրբեջանի տարածքային ճանաչման վերաբերյալ։ «Հայաստանում բացասական տրամադրություններ կան Փաշինյանի դեմ և սա շատ-շատ կարևոր կետ է, առ այսօր Փաշինյանը ոչ մի հետ քայլ չի արել»,- ասել է Էրդողանը։

Թուրքիայի նախագահը նաև անդրադարձել է այսպես կոչված Զանգեզուրի միջանցքի հարցին, ընդ որում ուշագրավ հայտարարություն արել, թե դրան դեմ է ոչ թե Հայաստանը, այլ Իրանը։ «Այս հարցում Իրանի մոտեցումը հիասթափեցնում է մեզ և Ադրբեջանին, ես ցանկանում եմ, որ մենք կարողանանք շուտով հաղթահարել այդ խնդիրը, եթե Իրանը դրական մոտեցում ցուցաբերի, ապա Թուրքիան, Իրանը և Ադրբեջանը կկապվեն միմյանց հետ և մենք կարող ենք ցամաքային ու երկաթուղային ճանապարհներով Պեկին-Լոնդոն ուղի ունենալ»,- նշել է Թուրքիայի նախագահը։

Ըստ էության, թուրք ղեկավարի այս հայտարարությունը վկայում է, որ Սյունիքի անվտանգության երաշխավորը ոչ թե Հայաստանի ապիկար և դավաճան իշխանությունն է, այլ աշխարհաքաղաքական կոնտեքստը և իրանի շահերը, այլապես Թուրքիան և Ադրբեջանը վաղուց չէին հապաղի հարձակում իրականացնելու հարցում։

Գրիշա Մելիքյան