Թուրքիան օրեցօր ավելի է ավելացնում իր նախապայմանները Հայաստանի նկատմամբ

Թուրքիան օրեցօր ավելի է ավելացնում իր նախապայմանները Հայաստանի նկատմամբ և լայն ազդեցություն ձեռք բերում գործող փաշինյանական վարչախմբի դեմ։ Եվ բոլորովին էլ զարմանալի չէ, որ նման իրավիճակում, որ թուրքական իշխանություններն ու քաղաքական շրջանակները չափազանց ծանր են տանում Հայաստանում հակաթուրքական ցանկացած քայլ։

Նեմեսիս գործողությունից հետո օդային տարածքը հայկական ավիաընկերությունների համար փակելուց հետո թուրքական իշխանությունները՝ այդ թվում նախկին արտգործնախարար Չավուշօղլուն, բազմիցս հայտարարել են, որ եթե հուշարձանը Երևանում չապամոնտաժվի, ապա նոր միջոցներ կձեռնարկեն Հայաստանի դեմ։ Այս օրերին էլ թուրքական ԶԼՄ-ները նոր հետաքրքրություն են գտել իրենց համար։ Երևանի մետրոպոլիտենի Հանրապետության Հրապարակի կայարանում փակցված Մեծ Հայքի քարտեզը դարձել է Թուրքիայում փորձագիտական որոշ շրջանակների համար առիթ Հայաստանին նոր մեղդրանքներ հղելուն։ Բեռլինում Ադրբեջանի դեսպան Նասիմի Աղաևի թվիթերյան գրառումից հետո, թե իբր այդ Մեծ Հայքի քարտեզում արտահայտվում են Հայաստանի բոլոր տարածքային պահանջներն ուղղված իրենց հարևաններին, թուրքական ԶԼՄ-ները պատմական Մեծ Հայքի քարտեզը բնորոշել են որպես սկանդալային և սադրիչ։ Եթե Նեմեսիս գործողության հուշարձանը ապամոնտաժելու ջանքերն առանձնապես հաջողությամբ չեն կարող պսակվել և հանրությունը թույլ չի տա դա իրականացնել, ապա չի բացառվում, որ փաշինյանական իշխանությունը հեռացնի Մեծ Հայքի քարտեզը՝ այդ կերպ նոր դիվիդենտներ հավաքելով պաշտոնական Անկարայում։

Ի դեպ երեկ կայացել է Հայաստանի արտգործնախարար Արարատ Միրզոյանի և Թուրքիայի ԱԳՆ նախարար Հաքան Ֆիդանի հեռախոսազրույցը։ Արարատ Միրզոյանը ջերմորեն շնորհավորել է Ֆիդանին՝ թուրքիայի արտաքին քաղաքական գերատեսչության ղեկավարի պաշտոնում նշանակվելու կապակցությամբ, և կողմերն արտահայտել են իրենց պատրաստակամությունը՝ շարունակել աշխատել երկու երկրների միջև հարաբերությունների ամբողջական կարգավորման ուղղությամբ։ Թե ի՞նչ է ասել Հաքան Ֆիդանը և ինչ պահանջներ ներկայացրել Արարատ Միրզոյանին, Հայաստանի արտգործնախարարությունը լռում է։ 

Արամ Աբգարյան