«Իրանի դեսպանը կարևոր նախազգուշացում է արել Հայաստանին և Ադրբեջանին»
ՎԵՐԼՈՒԾՈՒԹՅՈՒՆՆԵՐ
Iarex.ru-ն գրում է, որ Հայաստանում Իրանի դեսպան Աբբաս Բադախշան Զոհուրին, ի պատասխան Երևանի Ադրբեջանի հետ սահմանին ԵՄ առաքելություն տեղակայելու որոշման մասին հարցին, ասել է, որ առկա «հարցերը պետք է լուծվեն տարածաշրջանի երկրների մասնակցությամբ երկխոսության և բանակցությունների հիման վրա»։ Նրա խոսքով, Իրանի պաշտոնյաները բազմիցս են արտահայտել իրենց տեսակետը տարածաշրջանային խնդիրների լուծման վերաբերյալ։
Լրատվամիջոցների համար մեկնաբանելով Զանգեզուրի միջանցքի բացման հնարավորությունը դեսպանն ասել է. «Իրանի Իսլամական Հանրապետությունն ունի հստակ դիրքորոշումներ և օրինական շահեր տարածաշրջանում։ Փորձը ցույց է տալիս, որ մենք միշտ պաշտպանել ենք մեր օրինական իրավունքները և մեր հստակ դիրքորոշումն ենք հայտնել այդ առնչությամբ»։
Նման գնահատականներ պարբերաբար են հնչում Իրանի կողմից։ Փորձագետների կարծիքով, իրանական հայտարարություններն ուղղված են ինչպես հայկական, այնպես էլ ադրբեջանական լսարանին։ Իրանը ցանկանում է ցույց տալ, որ եթե նույնիսկ հենց Հայաստանում կան խմբեր, որոնք բացահայտ կամ անուղղակիորեն քարոզում են միջանցքի գաղափարը, ապա Թեհրանը դեմ է նման զարգացմանը։
Դրա համար կան մի քանի պատճառներ: Առաջինն այն է, որ Զանգեզուրի միջանցքը պետք է անցնի Մեղրիի իրանա-հայկական մաքսակետով, ինչը կարող է խանգարել Իրանի և Հայաստանի ուղիղ հաղորդակցությանը։ Մյուս կողմից, 2020 թվականի Ղարաբաղյան պատերազմում Հայաստանի կորուստը նաև բացասական հետևանքներ է ունեցել Իրանի համար, քանի որ նա ստացել է թուրքական հսկայական ազդեցությամբ տարածք իր հյուսիսային սահմանների մոտ։ Բացի այդ, տարածաշրջանում ամրապնդվել են նաև Իսրայելի ու ՆԱՏՕ-ի դիրքերը։
Հիշեցնենք, որ ավելի վաղ իրանական Mehr և Fars գործակալությունները, որոնց փորձագետներին կապում են Իսլամական հեղափոխության պահապանների կորպուսի հետ, հոդվածներ էին հրապարակել, որտեղ դատապարտում էին Զանգեզուրի միջանցքի ստեղծման անհրաժեշտության մասին Ադրբեջանի հայտարարությունները։ Հրապարակումների հեղինակները կարծում են, որ Ռուսաստանի, Իրանի և Չինաստանի համագործակցությունը կարող է խոչընդոտել Թուրքիայի և Իսրայելի ազդեցության ուժեղացմանը։
Նյութը հրապարակման պատրաստեց Կամո Խաչիկյանը
