Պետդեպի արձագանքը ցնցել է նույնիսկ Փաշինյանին

Միացյալ նահանգների պետքարտուղարությունը երեկ տարօրինակ մի հայտարարություն է արել, որին նույնիսկ ստիպված է եղել Հայաստանի ԱԳՆ-ն արձագանքել։ Պետքարտուղարության պաշտոնական ներկայացուցիչ Մեթյու Միլերը գրավոր հայտարարությամբ հույս է հայտնել, որ Հայաստանի և Ադրբեջանի առաջնորդները ԱՄՆ-ի Եվրոպացի գործընկերների հետ հանդիպումը արդյունավետ քայլ կլինի բանակցությունների սեղանի շուրջ խնդիրները լուծելու ուղղությամբ, այլ ոչ թե բռնության միջոցով։ «Վերջերս մենք բարձր ենք գնահատել վարչապետ Փաշինյանի հավատարմությունը խաղաղությանը և ողջունում ենք նախագահ Ալիևի վերջին հայտարարությունները համաներում քննարկելու մասին»,- ասել է Միլլերը։

Ադրբեջանի նախագահը, հիշեցնենք, օրեր առաջ Լաչինում հայտարարել էր, թե խաղաղության պայմանագիրը պետք է հիմնված լինի միջազգային պայմանների վրա, պետք է բացվի Նախիջևան տանող ճանապարհը, ինչպես նաև սպառնացել էր, որ կարող են գործողություններ իրականացնել Արցախում, ուստի Ղարաբաղի խորհրդարանը պետք է ցրվի իրեն նախագահ անվանող տարրը պետք է հանձնվի, բոլոր նախարարները, պատգամավորները և մյուսները պետք է թողնեն իրենց պաշտոնները, և միայն դրանից հետո Ադրբեջանը կմտածի համաներում հայտարարելու մասին։

Այն, որ ԱՄՆ պետդեպի ներկայացուցիչը ոչ թե քննադատում է Ադրբեջանի նախագահի այս ակնհայտ սպառնալիքները, այլ նույնիսկ ողջունում, վկայում է արցախյան կարգավորման գործընթացի վերաբերյալ Միացյալ նահանգների դիրքորոշման փոփոխության մասին։ Հատկապես այս օրերին, երբ պետքարտուղարի էներգետիկ հարցերով տեղակալ Ջեֆրիկ Փայաթը գտնվում է Բաքվում և այնտեղ հանդիպումներ է ունեցել պաշտոնատար ներկայացուցիչների հետ, նաև փոխանցել նախագահ Ջո Բայդենի ուղերձը, որ Ադրբեջանը էներգետիկ հարցերում ԱՄՆ-ի առանցքային գործընկերներից մեկն է։

Հայաստանի արտգործնախարարությունը հայտարարել է, թե Ադրբեջանի տարածքային ամբողջականության ճանաչումը չի կարող մեկնաբանվել որպես Լեռնային Ղարաբաղի դեմ էթնիկ զտումներ և ինքնիրավչություն իրականացնելու իրավասություն, նաև նշել է, թե՝ «Կարծում ենք , թե Միացյալ նահանգները ելնելով ժողովրդավարության և մարդու իրավունքների պաշտպանության դավանած արժեքների և տարածաշրջանում երկարատև խաղաղության հաստատման ուղղված հանձնարարությունից և ներգրավվածությունից, պետք է համարժեք արձագանքի այս հայտարարություններին՝ կանխելու Ադրբեջանի ղեկավարության ՀՀ ինքնիշխան տարածքի նկատմամբ ծավալապաշտական քաղաքականությունը և Լեռնային Ղարաբաղում էթնիկ զտումների նկրտումները»։ ԱՄՆ-ի խնդրահարույց արձագանքին նման նյարդային պատասխանը վկայում է, որ փաշինյանական վարչախումբն ինքն էլ սկսել է գիտակցել, թե ինչ օյին է իր գլխին բերում Վաշինգտոնը սեփական շահերը առաջ մղելու ուղղությամբ։

Գեղեցիկ Զիրոյան